బాహుబలి రిలీజ్ డేట్.. ఇదేం ట్విస్ట్?

Posted: 11/25/2016 03:49 PM IST

చరిత్ర తిరగరాసిన చిత్రం బాహుబలి సెకండ్ పార్ట్ చకచకా షూటింగ్ జరుపుకుంటుంది. ది కంక్లూజన్ 80 శాతం పైగానే టాకీ పార్టు పూర్తయిపోయింది. అంచనాలు ఏ మాత్రం తగ్గకుండా జక్కన్న పక్కగా చెక్కుతున్నాడు కూడా. డిసెంబర్ చివరికల్లా పూర్తి షూటింగ్ అయిపోగొట్టి జనవరి నుంచి ప్రమోషన్ కమ్ గ్రాఫిక్స్ వర్క్ పూర్తి చేసేసి మార్చి నెలాఖరుకల్లా అంతా సిద్ధం చేయాలని రాజమౌళి ప్లాన్.

అయితే అంతా సజావుగా సాగుతున్న సమయంలో లీకేజీ సమస్య నెత్తిన పిడుగులా పడింది. 9 నిమిషాల నిడివి ఉన్న వీడియోను గ్రాఫిక్స్ సహయకుడు ఒకరు లీక్ చేయటం తెలిసింది. వెంటనే అలర్ట్ అయిన నిర్మాతలు దానిని తొలగించేశారు. అయితే అప్పటికే వీడియోను చాలా మందిని చూసేయటం, దానిపై కాస్తంత అసంతృప్తి వ్యక్తం చేయటం కూడా జరిగిపోయాయి. ఈ నేపథ్యంలో బాహుబలి రిలీజ్ డేట్ మార్చాలని చూస్తున్నారంటూ మరో వార్త బయలుదేరింది.

ఏప్రిల్ 28 2017 సినిమా రావాల్సిన తేదీ. ఇప్పుడు లేటెస్ట్ అప్ డేట్ (గాసిప్ ) ఏంటంటే.. మరో నెల ముందుగానే, అంటే మార్చిలోనే ఈ సినిమాను రిలీజ్ చేసేందుకు ఫ్లాన్ చేస్తున్నారని, ఈ వార్తల్లో ఎంత వరకు నిజమో తెలీదుగానీ, అలా జరిగితే మాత్రం టాలీవుడ్ లోనే మరో బిగ్గెస్ట్ క్లాష్ తెరలేస్తుంది. ఎందుకంటే ఆ సమయంలోనే పవన్ కాటమరాయుడితోపాటు, బన్నీ డీజే కూడా రిలీజ్ కు సిద్ధమౌతాయి. అంతేకాదు వందల కోట్ల వ్యవహారంతో కూడిన బిజినెస్ చేసింది గనుక అదంతా అప్ సెట్ అయ్యే అవకాశం ఉంది. సో.. దీనిపై మేకర్స్ నుంచి అఫీషియల్ ప్రకటన వచ్చే దాకా వెయిట్ చేయటమే బెటర్.