మొత్తానికి క్లారిటీ ఇచ్చాడు

Posted: 06/06/2016 11:01 AM IST

Director trivikram srinivas given clatrity his film a aa movie rumours

నితిన్, సమంతలతో త్రివిక్రమ్ శ్రీనివాస్ తెరకెక్కించిన ‘అ..ఆ’ మూవీ పాజిటివ్ టాక్ తెచ్చుకుంది. సూపర్ హిట్ గా దూసుకుపోతోంది. అయితే ఈ మూవీ కథ వివాదంలా మారి రచ్చకెక్కింది. నాటి ప్రముఖ నవలా రచయిత్రి యద్దనపూడి సులోచనా రాణి నవల 'మీనా' నుంచి బేసిక్ ప్లాట్ లైన్‌ను ఈ సినిమా స్టోరీలో వాడుకున్నారని, దాదాపు కాపీ కథలా నడిచిందని టాక్ వచ్చింది. సోషల్ మీడియాలో ఇది హాట్ టాపిక్‌గా మారింది. ఈ చిత్రం టైటిల్స్‌లో సులోచనా రాణికి క్రెడిట్ ఇవ్వకపోవడమేమిటనే విమర్శలు రాగా.. వీటిపై త్రివిక్రమ్ వివరణ ఇచ్చాడు.

సుమారు తొమ్మిది నెలల క్రితం తాను సులోచనా రాణిని కలిసినప్పుడు ఈ కథ, పాత్రల గురించి ఆమెతో చర్చించానన్నాడు. అందువల్ల మూలకథ క్రెడిట్ ఆమెకే దక్కుతుందని చెప్పాడు. కొన్ని టెక్నికల్ రీజన్స్ వల్ల ఈ చిత్రంలో సులోచనారాణికి స్పెషల్‌గా వేసిన థ్యాంక్స్ కార్డు రాలేదని, ఇకపై టైటిల్ లో ఈ క్రెడిట్ కనిపిస్తుందని అన్నాడు. దీంతో వివాదం పరిష్కారమైనట్టే.. ఇంతకంటే నేను చెప్పేదేమీ లేదు అన్నాడు. అయితే త్రివిక్రమ్ ఈ విషయాన్ని ముందే చెప్పి ఉండవచ్చు కదా.. వివాదం తలెత్తింది గనుక సీన్‌లోకి వచ్చాడా అనే కామెంట్స్ వినిపిస్తున్నాయి. నిజానికి జూన్ 2న సినిమా రిలీజ్‌కి ముందే... మే నెల చివరివారంలో ఈ మూవీని సెన్సార్ చేసినప్పుడే సాంకేతిక తప్పిదాలన్నీ సరి చేసి ఉండవచ్చుగా అనే ప్రశ్నలు వినిపిస్తున్నాయి.