రాధాకృష్ణగా కామెడీ చేయనున్న విక్టరీ

Posted: 11/21/2015 01:03 PM IST

Venkatesh role in director maruthi radhakrishna film

‘గోపాల గోపాల’ తర్వాత విక్టరీ వెంకటేష్ హీరోగా ఏ ఒక్క ప్రాజెక్ట్ కూడా సెట్స్ పైకి వెళ్లలేదు. ఇటీవలే ‘భలే భలే మగాడివోయ్’ చిత్రంతో మంచి హిట్టును సొంతం చేసుకున్న దర్శకుడు మారుతి దర్శకత్వంలో వెంకీ ఓ సినిమా చేయడానికి గ్రీన్ సిగ్నల్ ఇచ్చిన విషయం తెలిసిందే. గతంలో వీరిద్దరి కాంబినేషన్లో ‘రాధా’ అనే చిత్ర ముహూర్త కార్యక్రమాలు జరుపుకొని, ఆగిపోయింది.

కానీ తాజాగా మరో కొత్త కథతో వెంకీని మెప్పించి, సినిమాను సెట్స్ పైకి తీసుకెళ్లడానికి మారుతి సిద్ధమవుతున్నాడు. ప్రస్తుతం స్ర్కిప్ట్ పనుల్లో మారుతి బిజీగా వున్నాడు. ఈ చిత్రానికి ‘రాధాకృష్ణ’ అనే టైటిల్ ను పరిశీలిస్తున్నారు. తాజా సమాచారం ప్రకారం... ఇందులో పోలీస్ ఆఫీసర్ పాత్రలో వెంకీ కనిపించనున్నాడని తెలుస్తోంది.

గతంలో ‘ఘర్షణ’ చిత్రంలో వెంకటేష్ పవర్ ఫుల్ పోలీస్ ఆఫీసర్ పాత్రలో నటించాడు. అయితే ఈ తాజా చిత్రంలో సిన్సియర్ పోలీస్ ఆఫీసర్ గా కనిపిస్తూనే నవ్వించనున్నాడని తెలిసింది. ఆయన పాత్ర చాలా కొత్తగా, వినోదభరితంగా వుండనుందని సమాచారం. కమర్షియల్ యూత్, మాస్ ఎంటర్ టైనర్ గా రూపొందనుందని తెలిసింది.

ఇందులో వెంకీ సరసన నయనతార హీరోయిన్ గా నటించనుంది. ఇప్పటికే వీరిద్దరూ కలిసి నటించిన ‘లక్ష్మీ’, ‘తులసి’ చిత్రాలు భారీ విజయాన్ని సొంతం చేసుకున్నాయి. మరి ఈ సినిమా వీరిద్దరికి హ్యట్రిక్ విజయాన్ని అందించనుంది. వచ్చే నెల 16న పూజా కార్యక్రమాలు జరుపుకొని, వచ్చే ఏడాది జనవరి నుంచి రెగ్యులర్ షూటింగ్ ను ప్రారంభించనున్నారు. త్వరలోనే చిత్ర యూనిట్ అధికారికంగా అన్ని వివరాలు తెలియజేయనున్నారు.