సమంత స్థానంలో కిక్2 భామకు ఆఫర్?

Posted: 08/26/2015 11:22 AM IST

Rakul preet singh replace samantha in mahesh brahmotsavam

టాలీవుడ్ ప్రిన్స్ మహేష్ బాబు నటించిన ‘శ్రీమంతుడు’ చిత్రం ఇటీవలే విడుదలై బ్లాక్ బస్టర్ హిట్టయ్యింది. బాక్సీఫీస్ రికార్డులను షేక్ చేసే విధంగా కలెక్షన్ల వర్షం కురిపిస్తుంది. ‘శ్రీమంతుడు’ చిత్రం తర్వాత మహేష్ నటించబోతున్న తాజా చిత్రం ‘బ్రహ్మోత్సవం’.

‘సీతమ్మ వాకిట్లో సిరిమల్లె చెట్టు’ చిత్రం తర్వాత మహేష్ బాబు హీరోగా ప్రముఖ దర్శకుడు శ్రీకాంత్ అడ్డాల కలయికలో తెరకెక్కబోతున్న ఈ ‘బ్రహ్మోత్సవం’ చిత్రాన్ని భారీ బడ్జెట్ చిత్రాల నిర్మాణ సంస్థ పివిపి బ్యానర్ పై ప్రముఖ నిర్మాత ప్రసాద్.వి.పోట్లూరి నిర్మించనున్నారు.

అయితే ఇందులో మహేష్ సరసన ముగ్గురు హీరోయిన్లు జతకట్టనున్నారు. ఈ హీరోయిన్ల విషయంపై ఇప్పటికే పలు వార్తలొచ్చాయి. సమంతను మొదటి హీరోయిన్ గా ఎంపిక చేసారని, రకూల్ ప్రీత్ సింగ్ ను మరో హీరోయిన్ గా అనుకున్నప్పటికీ ... డేట్స్ సర్దుబాటు కాకపోవడంతో ఈ ప్రాజెక్టు నుంచి రకూల్ తప్పుకున్నట్లుగా తెలిసిందే.

అయితే ఇపుడు సమంతను తీసేసి రకూల్ ను తీసుకోవాలని చిత్ర యూనిట్ భావిస్తున్నట్లుగా తెలిసింది. ఈ మధ్య రకూల్ నటిస్తున్న సినిమాలన్నీ కూడా భారీ విజయం సాధిస్తుండటం, అలాగే మహేష్ సరసన జోడిగా కొత్త హీరోయిన్ గా అయితేనే బాగుంటుందని రకూల్ ను మళ్లీ ఈ ప్రాజెక్టు కోసం సంప్రదిస్తున్నట్లుగా తెలిసింది.

మహేష్ తో ఇప్పటికే రెండు చిత్రాల్లో నటించింది. అందుకే సమంత స్థానంలో రకూల్ ను తీసుకోవాలని చిత్ర యూనిట్ భావిస్తున్నట్లుగా సమాచారం. రకూల్ కూడా ఈ ప్రాజెక్టులో నటించడానికి సిద్ధంగానే వుండటంతో.. తన డేట్స్ ను సర్దుబాటు చేసే పనిలో పడ్డట్లుగా తెలిసింది. త్వరలోనే చిత్ర యూనిట్ అధికారికంగా ప్రకటించనున్నారు.

ప్రస్తుతం ఈ చిత్రానికి సంబంధించిన ప్రీ ప్రొడక్షన్ పనులు చివరి దశకు చేరుకున్నాయి. వచ్చే నెల మొదటి వారంలో ఈ ప్రాజెక్టు సెట్స్ పైకి వెళ్లనుంది. ఈ చిత్రానికి మిక్కీ జే మేయర్ సంగీతం అందిస్తున్నాడు. ఈ చిత్రాన్ని వచ్చే ఏడాది సంక్రాంతి కానుకగా జనవరి 8న విడుదల చేయడానికి నిర్ణయించారు.