ఆటోజానీ కోసం హాటు భామ భారీ డిమాండ్

Posted: 05/29/2015 01:42 PM IST

Nayanthara hikes her remuneration for chiranjeevi auto johnny film

మెగాస్టార్ చిరంజీవి నటించబోయే 150వ సినిమా ‘ఆటోజానీ’ త్వరలోనే ప్రారంభం కానున్న విషయం తెలిసిందే. ప్రముఖ దర్శకుడు పూరీ జగన్నాథ్ దర్శకత్వంలో తెరకెక్కనున్న ఈ చిత్రాన్ని మెగాపవర్ స్టార్ రాంచరణ్ తేజ తన సొంత బ్యానర్ పై నిర్మించనున్నాడు.

ఈ చిత్రంలో చిరు సరసన హీరోయిన్ గా ఎవరైతే బాగుంటారని అటు చిత్ర యూనిట్ తో పాటు ఇటు అభిమానులు కూడా తెగ ఆలోచిస్తున్నారు. చిరు పక్కన ఏ హీరోయిన్ అయితే బాగుంటుందని అభిమానుల్లో ఉత్కంఠ మొదలయ్యింది. కానీ ‘ఆటోజానీ’ సినిమా కోసం కోలీవుడ్ స్టార్ హీరోయిన్ నయనతారను అనుకున్నట్లుగా గతకొద్ది రోజులుగా వార్తలు వినిపిస్తున్నాయి.

కానీ నయనతార మాత్రం ఈ సినిమా కోసం భారీ మొత్తంలో రెమ్యునరేషన్ డిమాండ్ చేస్తున్నట్లుగా పుకార్లు వినిపిస్తున్నాయి. ‘ఆటోజానీ’ చిత్ర యూనిట్ నయనతారను సంప్రదించారో లేదో తెలియదు, నయనతార భారీ రెమ్యునరేషన్ డిమాండ్ చేసిందో లేదో తెలియదు కానీ.. కోలీవుడ్, టాలీవుడ్ లలో మాత్రం నయనతార ఈ సినిమా కోసం భారీ రెమ్యునరేషన్ డిమాండ్ చేస్తున్నట్లుగా వార్తలొస్తున్నాయి.

‘ఆటోజానీ’ కోసం నయనతార దాదాపు మూడున్నర కోట్లు డిమాండ్ చేసిందని సమాచారం. నయనతార కాకుండా చిరుతో అనుష్క జోడి బాగానే వున్నప్పటికీ.. అనుష్క ప్రస్తుతం వరుస సినిమాలతో బిజీగా వుంది. చిరు సినిమా కోసం డేట్స్ సర్దుబాటు చేసే పరిస్థితిలో లేదు. దీంతో నయనతారకు మరింత కలిసొచ్చినట్లుగా వుంది. అందుకే నయనతార ఈ విధంగా భారీ రెమ్యునరేషన్ ను డిమాండ్ చేస్తోందంటూ వార్తలొస్తున్నాయి.

అంతే కాకుండా నయనతార అయితేనే బాగుంటుందని చిత్ర యూనిట్ భావిస్తున్నారట. నయనతార కోరినంత రెమ్యునరేషన్ ఇవ్వడానికి చిత్ర నిర్మాతలు సిద్ధంగా వున్నట్లుగా తెలిసింది. మరి ఈ విషయంపై త్వరలోనే ఓ క్లారిటీ రానుంది. ఈ ప్రాజెక్టు చిరంజీవి పుట్టినరోజు సంధర్భంగా సెట్స్ పైకి వెళ్లనుంది. త్వరలోనే అన్ని వివరాలను అధికారికంగా ప్రకటించనున్నారు.