మురళీమోహన్ వల్లే ‘మా’ ఎన్నికల్లో జయసుధ ఓడిందా?

Posted: 04/17/2015 12:04 PM IST

టాలీవుడ్ లో ఎంతో ఉత్కంఠ భరితంగా కొనసాగిన ‘మా’ ఎన్నికల్లో ఎట్టకేలకు నటకిరీటి రాజేంద్రప్రసాద్ గెలుపొందారు. ఈ ఎన్నికల్లో మరో అభ్యర్థిగా జయసుధ కూడా నిలిచిన విషయం తెలిసిందే! ఈ ఎన్నికల్లో గెలవాలని ఎంతో ఆశించిన ఆమెకు చివరకు ఓటమి తప్పలేదు. ఈ ఎన్నికల్లో జయసుధ ఓటమికి మురళీమోహన్ ప్రధాన కారణమని.. ఆయన వల్లే ఈ ‘మా’లో కొన్ని అవకతవకలు కూడా జరిగాయని అనుకుంటున్నారు.

వివరాల్లోకి వెళ్తే.. ఈ ఎన్నికల్లో నిలిచిన ఇద్దరు అభ్యర్థుల్లో రాజేంద్రప్రసాద్ కు మద్దతుగా నాగబాబు నిలవగా.. జయసుధకు మురళీమోహన్ సపోర్ట్ గా నిలిచిన సంగతి విదితమే! ఈ రెండు ప్యానెల్స్ మధ్య మొదట మాటలయుద్ధాలు కూడా జరిగాయి. ఒకరిమీద మరొకరు ఆరోపణలు వెల్లువెత్తుకున్నారు. ముఖ్యంగా మురళీ మోహన్ మీద ఎన్నో ఆరోపణలు వచ్చాయి. దాదాపు రెండు దఫాలు ‘మా’ అధ్యక్షుడిగా కొనసాగిన ఆయన.. ఆర్టిస్టుల కోసం ఎటువంటి పథకాలు అమలు చేయలేదని, అలాగే కొన్ని కార్యక్రమాల ద్వారా వచ్చిన డబ్బులను తన సొంత వ్యవహారాలకు వినియోగించుకున్నారని ఆయన మీద విమర్శలు వచ్చాయి. ఇందుకు తగ్గ సాక్ష్యాలు కూడా తన దగ్గర వున్నాయని నటుడు ఓ కల్యాణ్ కూడా తెలుపుతూ కోర్టుకెళ్లడంతో అది కాస్త వివాదమైంది. ఈ నేపథ్యంలోనే ఎన్నికల కౌంటింగ్ ఆలస్యమైంది కూడా!

అంతేకాదు.. ఈ ఎన్నికల్లో రాజేంద్రప్రసాద్ నిలబడతారని అభిప్రాయం వెల్లడించిన వెంటనే మురళీమోహన్ ఆయనకు వ్యతిరేకంగా జయసుధను తీసుకొచ్చారని వాదనలు వినిపించాయి. తాను ఎలాగో ఈ పదవి నుంచి తప్పించుకున్నారు కాబట్టి.. మళ్లీ ఆయనే ఇందులో కొనసాగే అవకాశం లేకపోవడంతో ఆయన ఆ పదవిని జయసుధకు అప్పగించి.. తాను అధికారం చేపట్టాలనే ఉద్దేశంతోనే ఆమెను తీసుకొచ్చారన్న ఊహాగానాలు వినబడ్డాయి. ఈయనకు సపోర్ట్ గా దాసరి నారాయణరావు కూడా నిలబడ్డారని, వీరిద్దరు కలిసి జయసుధకు మద్దతు పలికారన్న గాసిప్స్ వినిపించాయి. ఇక గతంలో మురళీమోహన్ చేసిన కొన్ని తప్పిదాల వల్ల ఆయన మద్దతులో ఎన్నికల్లో నిలబడ్డ జయసుధను ఓడించారని వార్తలొస్తున్నాయి.

అటు.. రాజేంద్రప్రసాద్ కు మద్దతు పలికిన నాగబాబు, మెగాఫ్యామిలీ ఇచ్చిన సపోర్ట్ తోనే ఆయన గెలుపొందారని మరికొందరు అభిప్రాయాలు వ్యక్తం చేస్తున్నారు. నాగబాబు ఈయనకు మద్దతు ఇచ్చిన నేపథ్యంలో మెగాఫ్యామిలీకి వ్యతిరేకంగా దాసరి నిలబడి జయసుధకు మద్దతు పలికారని ఆరోపణలు కూడా వచ్చాయి. ఈ మొత్తం వ్యవహారాన్ని గమనిస్తే.. మురళీమోహన్ మొత్తం ప్లాన్ ప్రకారం కొన్ని ప్రణాళికలు రచించి జయసుధను ఎన్నికల్లో అభ్యర్థిగా నిలబెట్టారని.. ఆమె గెలిస్తే అధికారం ఈయనకు దక్కుతుందన్న ఆశతోనే ఆయన ఇలా చేశారని అనుకున్నారు. ఈ నేపథ్యంలోనే ఆయన్ను ఓడించి.. రాజేంద్రప్రసాద్ ని గెలిపించారని భావిస్తున్నారు. ఏదిఏమైనా.. రాజేంద్రప్రసాద్ గెలుపొందడంపై ఆయన ప్యానెల్ హర్షం వ్యక్తం చేస్తున్నారు.