షారుఖ్ ను లక్ష్యంగా చేసుకున్న అండర్’వరల్డ్ గ్యాంగ్

Posted: 11/19/2014 09:33 PM IST

Underworld don ravipujari gang targeted shahrukh khan farahkhan and maheshbhat police confirms

గతకొన్నాళ్లక్రితం బాలీవుడ్ బాద్షా షారుఖ్ ఖాన్’కు అండర్’వరల్డ్ డాన్ రవిపూజారీ నుంచి బెదిరింపులు కాల్స్ వచ్చాయనే వార్తలు సంచలనం సృష్టించిన విషయం తెలిసిందే! అతనితోపాటు మరో బాలీవుడ్ నిర్మాత, ఇతర ప్రముఖ నటులకు బెదిరింపులు వచ్చినట్లుగా వార్తలు వచ్చాయి. మిగతావిషయాలేమోగానీ.. షారుఖ్ మాత్రం తనకు ఎటువంటి బెదిరింపులు రాలేదని అప్పట్లో స్పష్టం చేశాడు. అయితే ముందుజాగ్రత్తగా పోలీసులు మాత్రం అప్రమత్తమయ్యారు. అన్నివిధాలుగా ఏర్పాటు చేసుకుని, సెలబ్రిటీల నెంబర్లను ట్రాకింగ్’లో పెట్టినట్లు సమాచారం! ఎందుకంటే.. ఈమధ్య తెలియని నెంబర్లనుంచి సెలబ్రిటీలకు కాల్స్ వస్తున్నాయని తెలుసుకున్న నేపథ్యంలో ఎవరికీ తెలియకుండా గోప్యంగా తమ నెట్’వర్క్ కార్యకలాపాలను పోలీసులు నిర్వహిస్తున్నాయని బాలీవుడ్ మీడియాలో కథనాలు వచ్చాయి.

షారుఖ్, ఇతర సెలబ్రిటీలకు కేవలం బెదిరింపులు వచ్చాయనే వార్తలు వచ్చాయి కానీ.. ప్రముఖ నిర్మాత కరీమ్ మోరానీ ఇంటివద్ద ఆగస్టులో ఏకంగా రవిపూజారి గ్యాంగ్ మనుషులు కాల్పులే జరిపారు. ఆ ఘటన జరిగిన మరుక్షణం నుంచే ముంబయి పోలీసులు ముమ్మరం దర్యాప్తు ప్రారంభించారు. అందులో భాగంగానే ఏడుగురిని అరెస్ట్ చేశారు కూడా! అలా అరెస్ట్ చేసిన వారందరినీ విచారించగా.. పోలీసులే ఖంగుతినేంతగా వాళ్లు తమ అభిప్రాయాలను వెల్లడించారని చెబుతున్నారు. అగ్రహీరో షారుఖ్’తోబాటు దర్శకురాలు ఫరాఖాన్, దర్శకనిర్మాత మహేష్ భట్’లను ఆ రవిపూజారి గ్యాంగ్ లక్ష్యంగా ప్రణాళిక చేసుకున్నట్టు ముంబయి పోలీసులు వెల్లడించారు. అరెస్టయిన వారంతా విదేశాల్లో తలదాచుకుంటున్న అండర్’వరల్డ్ డాన్ రవిపూజారీ గ్యాంగ్’కు చెందిన వారని పోలీసులు తెలిపారు. గతరెండు నెలలుగా వీళ్లందరూ ఆ అగ్రతారలపై నిఘా పెట్టారని వాళ్లు పేర్కొన్నారు.