ఆలు లేదు.., చూలు లేదు డైరెక్టర్ పేరేమో...

Posted: 10/27/2014 10:01 AM IST

Vv vinayak to direct kaththi movie with pawan kalyan in telugu

పవన్ కళ్యాణ్ కొత్త సినిమా గురించి వస్తున్న వార్తలు వింటుంటే ‘ఆలు లేదు, చూలు లేదు కొడుకు పేరు సోమలింగం’ అనే పాత సామెత గుర్తుకు వస్తోంది. తమిళంలో విడుదల అయిన కత్తిని తెలుగులో పవన్ తో రిమేక్ చేయిస్తారని చెప్తున్నారు. అయితే దీనిపై ఎలాంటి అధికారిక ప్రకటన రాలేదు. సినిమా తెలుగు రీమేక్ రైట్స్ ఇస్తున్నట్లు కానీ.., తీసుకుంటున్నట్లు కానీ ఎవరూ ప్రకటన చేయలేదు. ఇలా ఏదీ లేకముందే ఈ ప్రాజెక్టును నేను డైరెక్ట్ చేస్తానంటూ ఓ పెద్దాయన ముందుకు వచ్చారు. ఆయనే వి.వి. వినాయక్.

పవన్ తో ‘కత్తి’ సినిమా తెలుగులో తీస్తే.., ఆ మూవీకి తాను డైరెక్ట్ చేసేందుకు సిద్దమని వినాయక్ ప్రకటించారు. ఈ ప్రాజెక్టుతో పవన్ తో సినిమాను చేయాలన్న తన కోరికను తీర్చుకోవాలని వినాయక్ తహతహలాడుతున్నాడు. వినాయక్ అభిప్రాయంపై సినీ ప్రముఖులు కొందరు నవ్వుకుంటున్నారు. రీమేక్ పై సస్పెన్స్ ఇంకా వీడలేదు, అప్పుడే తాను ఈ సినిమా చేస్తానని చెప్పటం ఏంటని చర్చించుకుంటున్నారు. అయితే నిప్పు లేనిదే పొగ రాదు కదా అని మరికొందరు అంటున్నారు. ఇదెలాగంటే.., గతంలో ప్రకటించిన ప్రకారం ఈ సినిమా తెలుగు డబ్బింగ్ విడుదల తేదీ ఈ నెల 31. గడువు దగ్గరపడుతున్నా ఇప్పటివరకు ఎలాంటి ప్రచార ఆర్బాటాలు చేయలేదు. దీన్నిబట్టి సినిమా విడుదల లేనట్లే అని అంటున్నారు.

దీపావళి కానుకగా తమిళనాడులో విడుదల అయిన ‘కత్తి’ విజయవంతంగా ఆడుతోంది. భారీ కలెక్షన్లు వసూలు చేస్తూ.., సినిమాపై ఉన్న అంచనాలు నిలబెట్టుకుంది. అయితే గతంలో పవన్ తో తెలుగు, తమిళ సినిమాలు మార్చుకున్న విజయ్ ఈ విషయంలో మాత్రం కాస్త బెట్టు వీడటం లేదని తెలుస్తోంది. ‘కత్తి’ని రీమేక్ కు బదులు డబ్బింగ్ చేసి విడుదల చేయాలని నిర్ణయించారు. ఇందుకు సంబంధించి అన్ని పనులు పూర్తయ్యాయి కూడా. అయితే తెలుగులో పవన్ తో విడుదల చేస్తే ఎక్కువ కలెక్షన్లు వస్తాయని డైరెక్టర్, నిర్మాత భావిస్తున్నారు. అందువల్లే తెలుగులో సినిమా విడుదల ఆగిపోయిందని తెలుస్తోంది. మరి దీనిపై సస్పెన్స్ కు ఎప్పుడు తెరపడుతుందో చూడాలి.

కార్తిక్