మెగా ఫ్యామిలీతో ఫిక్సయిన బోయపాటి

Posted: 07/09/2014 10:02 AM IST

Chiranjeevi 150th movie with boyapati srinu

చిరంజీవి నటించబోయే 150వ చిత్రానికి ప్రముఖ దర్శకుడు వి.వి.వినాయక్ దర్శకత్వం వహించనున్నాడని వార్తలు వస్తున్న విషయం తెలిసిందే. అయితే ఈ జాబితాలోకి మరో దర్శకుడు వచ్చి చేరారు. ‘లెజెండ్’ వంటి బ్లాక్ బస్టర్ హిట్ చిత్రం తర్వాత దర్శకుడు బోయపాటి శ్రీనివాస్ తెరకెక్కించనున్న తదుపరి చిత్రంపై ఇప్పటికే రకరకాల వార్తలు వస్తున్నాయి. ‘సింహ’, ‘లెజెండ్’ వంటి వరుస చిత్రాల తర్వాత బోయపాటి ఫుల్ ఫాంలో ఉండటంవల్ల ఈ దర్శకుడికి క్రేజ్ బాగా పెరిగిపోయింది.

త్వరలోనే రాంచరణ్ తో బోయపాటి ఓ చిత్రం తెరకెక్కించనున్నాడని వార్తలు వచ్చిన విషయం తెలిసిందే. రాంచరణ్ కోసం బోయపాటి ఓ పక్కా కమర్షియల్ మాస్ మసాలా స్ర్కిప్టును సిద్ధం చేసాడని తెలిసింది. అయితే చరణ్ కు ఆ కథ నచ్చినప్పటికీ కూడా ఆ ప్రాజెక్టును పక్కకు పెట్టినట్లుగా తెలిసింది. కానీ తన తండ్రి కోసం ఏదైనా మంచి కథ ఉంటే చెప్పమని చరణ్ కోరడంతో... బోయపాటి ఓ పవర్ ఫుల్ కథను చిరు, చరణ్ లకు వినిపించాడట. బోయపాటి చెప్పిన కథ నచ్చడంతో వెంటనే స్క్రిప్టు రెఢీ చేయమని చెప్పారట చరణ్. ప్రస్తుతం బోయపాటి కథను పక్కాగా సిద్ధం చేసే పనిలో పడ్డాడని తెలిసింది. కానీ ఈలోపు మరే ఇతర దర్శకుడు, రచయితైనా మంచి కథతో చిరును సంప్రదిస్తే బోయపాటికి అవకాశం పోయినట్లే మరి.

ఒకవేళ చిరు ప్రాజెక్టు బోయపాటికి దక్కకపోయినా కూడా తన కొడుకు చరణ్ తో కలిసి ఓ సినిమాను తెరకెక్కించేందుకు రెడీగా ఉన్నాడు బోయపాటి. చరణ్, అల్లు అర్జున్ లకు విడివిడిగా ఓ కథను చెప్పాడంట బోయపాటి. ఆ కథలు బన్నీ చెర్రీలకు నచ్చాయంట. కాబట్టి... చిరు ప్రాజెక్టు బోయపాటికి దక్కకపోతే మెగా ఫ్యామిలీ హీరోలో ఎవరితోనైనా సినిమా మాత్రం పట్టాలెక్కడం ఖాయమని తెలిసింది. మరి బోయపాటి దర్శకత్వంలో నటించబోయే ఆ మెగా ఫ్యామిలీ లక్కీ హీరో ఎవరో త్వరలోనే తెలియనుంది.