పవన్ పవర్ కి ఎన్నిసార్లు మచ్చు చూస్తాం ?

Posted: 02/11/2014 10:55 AM IST

ఎందరో మహానుభావులు, అందరికీ వందనములు అంటుంది విజయం సాధించి చలనచిత్రం.  సినిమా విజయానికి అందులో పనిచేసిన ప్రతి ఒక్కరి భాగస్వామ్యం వారి వారి స్థాయిలో వారి వంతుగా ఉంటుంది.  అటువంటి విజయాన్ని ఏ ఒక్కరికీ ప్రత్యేకంగా ఆపాదించటం ఎంత అసమంజసమో అలాగే అపజయానికీ ఏ ఒక్కరినీ ప్రత్యేకంగా బాధ్యులను చెయ్యటం సరైనది కాదు.  పూర్తి బాధ్యత మాత్రం దర్శకుడిదే అని చెప్పుకోవచ్చు.  ఎందుకంటే ముందుగా ఆ సినిమాను తన మనసులో నిర్మించుకుని దానికనుగుణంగా ఫిల్మ్ లోకి ఎక్కించవలసినవాడు, దానికి తగ్గట్టుగా నటీనటులకు సన్నివేశాన్ని వివరించి చెప్పి వాళ్ళ చేత నటింపచేసేవాడు దర్శకుడే కనుక. 

అయితే సినిమాలలో ఎన్నో నమ్మకాలు పెట్టుకోవటం వలన ముహూర్తం పెట్టుకోవటం, పూజలు చెయ్యటం, పెద్దవాళ్ళను పిలవటం, వాళ్ళ ఆశీర్వాదాలు, శుభాకాంక్షలను అందుకోవటం చేస్తుంటారు.  అలాగే పవన్ కళ్యాణ్ పవరేంటో అర్థమైంది కాబట్టి రెండు ఆడియా విడుదలలకు ఆయనను పిలవటం జరిగింది.  ఒకటి మేనల్లుడు సాయిధర్మతేజ రే చిత్రానికి, మరొకటి బ్రహ్మానందం కుమారుడు గౌతమ్ బసంతి చిత్రానికి. 

ఈ రెండు చిత్రాలు విజయం సాధిస్తే పవన్ కళ్యాణ్ కాలు పెట్టిన చోట బంగారం పండుతుందని, లేదంటే ఆయనది ఐరన్ లెగ్ అని అర్థమౌతుందని కొందరు భావిస్తున్నారట! బంగారాన్ని ఎన్నిసార్లు గీచి మచ్చు చూస్తారు?  ఒక్కసారి చూస్తే దాని కేరట్లు ఎంతో అర్థమైపోతుంది కదూ!  లేదూ, పొద్దున్నే లేవగానే ఒకసారి మళ్ళీ గీచి చూస్తాను అంటే అది కొన్నాళ్ళకి అరిగి పోయి కంటికి కనపడకుండా పోతుంది! 

పవన్ కళ్యాణ్ పవరేమిటో నిరూపించటం జరిగిపోయింది.  ఇక అన్నిట్లో దాన్ని నిరూపించుకోవాలని పవన్ కళ్యాణ్ కంకణం కట్టుకుని రంగంలోకి దిగలేదు కదా!  పైగా ఆయనెప్పుడైనా తన పవర్ గురించి ఎవరితోనైనా సవాల్ చెయ్యటం జరిగిందా?  మనమే ఆయనకు శక్తులు ఆపాదించి, దానికి అనుగుణంగా మాకు ఫలితాలనివ్వమనటం అన్యాయం కదూ!  పైగా పవన్ పవర్ కి ఇదో పరీక్షలాగా చూడటం సరైనది కాదని ఒప్పుకుంటారు కదూ!

-శ్రీజ