రూ. 50 కోట్ల దిశగా దూసుకెళ్తున్న ‘నవాబ్’

Posted: 10/01/2018 04:21 PM IST

Mani ratnam s nawab marking towards rs 50 cr club

మణిరత్నం దర్శకత్వంలో రూపోందిన చిత్రం నవాబ్ గత గురువారం విడుదలైన విషయం తెలిసిందే. ఇదే సినిమాకు 'చక్క చివంత వానం' అనే టైటిల్ తో తమిళంలో కూడా అదే రోజున విడుదల చేశాయి చిత్ర నిర్మాణవర్గాలు. తెలుగులో సరైన ప్రమోషన్స్ లేని కారణంగా.. సినిమాకు కూడా అదరణ కాసింత తక్కువైంది. మణిరత్నం తానే నిర్మాత, దర్శకుడిగా జోడు పదవులను చేపట్టిన ఈ నవాబ్ సినిమా అనుకున్న స్థాయిలో తెలుగు ప్రేక్షకుల దృష్టిని ఆకర్షించలేదు.

కానీ తమిళంలో మాత్రం ఈ సినిమా వసూళ్ల పరంగా ఒక రేంజ్ లో దూసుకుపోతోంది. విడుదలై నాలుగు రోజుల వ్యవధిలోనే రూ. 50 కోట్ల రూపాయల క్లబ్ లో చేరేందుకు పరుగులు పెడుతూ ముందుకు సాగుతుంది. మొదటి మూడు రోజులకు గాను ఈ సినిమా 21.70 కోట్ల గ్రాస్ ను వసూలు చేయగా, ఆదివారం ఒక్క రోజునే రూ.8 కోట్ల గ్రాస్ వసూలు చేసి 30 కోట్ల క్లబ్ లోకి చేరిపోయింది.

మణిరత్నం కెరియర్లో బెస్ట్ ఓపెనింగ్స్ ను రాబట్టిన సినిమా ఇదేనని సినీ వర్గాలు చెబుతున్నాయి. ఇక అక్టోబర్ 2న గాంధీజయంతి కావడంతో ఈ రోజున కూడా అదివారం తరహా స్పందనే ప్రేక్షకుల నుంచి లభిస్తే.. సినిమా వారం రోజుల్లో రూ 50 కోట్ల క్లబ్ లోకి చేరిపోవడం ఖాయమని సినీ పండితులు అంచనాలు వేస్తున్నారు.