కన్నుగీటిన ప్రియా ప్రకాష్ చిత్రానికి లైన్ క్లియర్..

Posted: 08/31/2018 08:09 PM IST

‘ఒరు అదార్‌ లవ్’ చిత్రంలో కథనాయికగా నటించిన ప్రముఖ మలయాళ నటి ప్రియా ప్రకాశ్‌ వారియర్ యూట్యాబ్ స్టార్ గా వెలుగొందడంతో పాటు దేశవ్యాప్తంగా కుర్రకారు మనసుల్ని దోచేసింది. అమె ఓరగా చూస్తూ కన్నుగీటడం.. నెట్టింట్లో వైరల్ గా మారిన విషయం తెలిసిందే. అయితే తమ మనోభావాలను కించపరిచేలా పాటలు ఉన్నాయంటూ తెలంగాణకు చెందిన కొందరు ముస్లింలు కేసు వేసిన సంగతి తెలిసిందే.

దాదాపు నాలుగు నెలల పాటు విచారణలో ఉన్న ఈ కేసు ఇవాళ్టితో ఓ కొలిక్కి వచ్చింది. ప్రియ వారియర్ కు ఊరట లభించింది. అమె నటించిన చిత్రం విడుదలకు కూడా లైన్ క్లియర్ అయ్యింది. ప్రియపై వేసిన కేసును కొట్టివేస్తూ శుక్రవారం సర్వోన్నత న్యాయస్థానం సుప్రింకోర్టు తీర్పువెలువరించింది. ‘ఒరు అదార్ లవ్’ చిత్రంలోని ‘మాణిక్య మలరయ’ పాటలో ప్రియ కన్నుగీటడంపై దాఖలైన కేసులపై సుప్రింకోర్టు ప్రధాన న్యాయమూర్తి దీపక్ మిశ్రా అగ్రహం వ్యక్తం చేశారు.

ఈ పాట కేరళకు చెందిన ముస్లిం సంప్రదాయపు గీతం అని, ఇందులో ప్రియ కన్నుకొట్టడం అసభ్యకరంగా ఉందంటూ పలువురు ముస్లింలు ఆగ్రహం వ్యక్తం చేశారు. దాంతో సినిమా వాయిదా పడుతూ వచ్చింది. ఈ కేసుపై సుప్రీంకోర్టు ప్రధాన న్యాయమూర్తి దీపక్‌ మిశ్రా మాట్లాడుతూ..‘ఎవరో సినిమాలో ఏదో పాట పాడితే మీకు కేసు వేయడం తప్ప మరో పనేం లేదా?’ అని ఆగ్రహం వ్యక్తం చేశారు. ఒమర్‌ లులు ఈ చిత్రానికి దర్శకత్వం వహించారు. అబ్దుల్‌ రహూఫ్‌ కథానాయకుడిగా నటించారు. సుప్రీంకోర్టు తీర్పుతో ఈ చిత్రం త్వరలో ప్రేక్షకుల ముందుకు వచ్చే అవకాశం ఉంది.