జై సింహా నిర్మాతపై ఐటీ దాడులు

Posted: 01/17/2018 02:38 PM IST

యావరేజ్ కంటెంట్ అయినప్పటికీ నందమూరి బాలకృష్ణ నటించిన తాజా చిత్రం జై సింహాకు ప్రేక్షకుల నుంచి మంచి స్పందన వస్తోంది. ఈ సినిమా జనవరి 12న విడుదలైన విషయం తెలిసిందే. ఈ సినిమాను కేఎస్ రవికుమార్ దర్శకత్వంలో సి.కల్యాణ్ నిర్మించారు. ప్రస్తుతం ‘జై సింహా’కు పోటీనిచ్చే సినిమా ఏదీ లేకపోవడంతో ఈ సినిమాకు థియేటర్లు భారీగా పెరిగినట్లు తెలుస్తోంది.

ఇదిలా ఉంటే ఈ సినిమా నిర్మాత కార్యాల‌యంలో ఐటీ శాఖ సోదాలు నిర్వహిస్తోంది. కృష్ణాన‌గ‌ర్‌లోని సి.కల్యాణ్ కార్యాలయానికి వచ్చిన ఐటీ అధికారులు తనిఖీలు ప్రారంభించారు. ఈ చిత్రం 27 కోట్ల ప్రీ రిలీజ్ బిజినెస్ చేయగా.. ఇప్పటికే 26 కోట్లకు పైగా రాబట్టినట్లు చెబుతున్నారు.

సినిమా రిలీజ్ కు ముందు గతంలో బడా ప్రొడ్యూసర్ ల ఇళ్లు, ఆఫీసుల్లో ఐటి దాడులు జరగటం చూశాం. కానీ, ఇప్పుడు థియేటర్లలో ప్రదర్శితమవుతుండగానే ఐటీ దాడులు చోటు చేసుకోవటం విశేషం. పూర్తి వివరాలు అందాల్సి ఉంది.