జియా ఖాన్ కేసుపై మోదీకి లేఖ

Posted: 09/18/2017 06:32 PM IST

Jia khan mother writes letter to pm modi

బాలీవుడ్ లో నిశ్శ‌బ్ద్‌, గ‌జిని, హౌస్‌ఫుల్‌ వంటి చిత్రాల్లో నటించి యూత్ లో మంచి క్రేజ్ దక్కించుకున్న నటి జియా ఖాన్ 2013లో ఆత్మహత్య చేసుకున్న విషయం తెలిసిందే. సినిమా అవ‌కాశాలు రాక‌పోవ‌డంతో ఆమె అంత పని చేసిందని చెబుతున్నప్పటికీ.. జియా బాయ్ ఫ్రెండ్ సూరజ్ పంచోలీ హత్య చేశాడని(సూసైడ్ కు ప్రేరేపించటం) టాక్ అప్పట్లో వినిపించింది. ఇదే మాటను మొదటి నుంచి చెబుతూ ఆమె ఆమె త‌ల్లి ర‌బియా ఖాన్ న్యాయపోరాటం చేస్తూ వస్తోంది కూడా.

ఈ కేసు విష‌యంలో న్యాయం చేయాలని కోరుతూ ఇప్పడు ఆమె త‌ల్లి ర‌బియా ఖాన్ ప్ర‌ధాని న‌రేంద్ర మోదీకి బహిరంగ లేఖ రాసింది. త‌న కూతురు కేసు విష‌యంలో సీబీఐ నిర్ల‌క్ష్యంగా వ్య‌వ‌హరిస్తోంద‌ని ఆమె లేఖ‌లో పేర్కొంది. అలాగే త‌న కూతురిది ఆత్మ‌హ‌త్య కాద‌ని, హ‌త్య చేసి ఆత్మ‌హ‌త్య‌లాగా క‌నిపించేలా చేశార‌ని ఆమె తెలిపింది. అందుకు జియా ఖాన్ ఒంటి మీద గాయాల ద్వారా ఆ విష‌యం తెలుస్తుంద‌ని చెప్పింది.

ఆ విష‌యానికి ధ్రువీక‌రించే ఫోరెన్సిక్ ఆధారాలు త‌న ద‌గ్గ‌ర ఉన్నాయ‌ని ర‌బియా ఖాన్ లేఖ‌లో తెలియ‌జేసింది. త‌న కూతురి కేసులో విచార‌ణ జ‌ర‌ప‌డానికి సీబీఐ మొద‌ట్నుంచి అనాస‌క్తి చూపిస్తోంద‌ని, వాళ్లు త‌ల‌చుకుంటే జియా ఖాన్ హ‌త్య‌కు సంబంధించి అన్ని ర‌కాల ఆధారాలు క‌నిపెట్ట‌గ‌ల‌ర‌ని, కాకపోతే వాళ్లు తాను చెప్పేది కూడా ప‌ట్టించుకోవ‌డం లేద‌ని ఆమె ఆరోపించింది. బ్రిటిష్ ఫోరెన్సిక్ నిపుణులు ఆమెది హత్యేనని తేల్చిన నివేదికను ఆమె లేఖలో ప్రస్తావించారు.