పైసా వసూల్ టీజర్ డేట్ ఫిక్స్

Posted: 07/25/2017 02:55 PM IST

టాలీవుడ్ లో ఇప్పుడు ఓ క్రేజీ కాంబోలో వచ్చే సినిమా కోసం అంతా ఆత్రుతగా ఎదురు చూస్తున్నారు. పూరీ డైరక్షన్ లో నందమూరి బాలకృష్ణ నటిస్తున్న 101వ చిత్రం 'పైసా వసూల్' కోసమే మనం చెప్పుకునేది. పైగా సినిమా ఫస్టు లుక్ వచ్చిన తర్వాత అంచనాలు మరింతగా పెరిగిపోయాయి. ఆ అంచనాలు మరింత పెంచాలంటే సాధ్యమైనంత త్వరగా టీజర్ ను తెచ్చేందుకు టీమ్ రెడీ అవుతోంది.

జూలై 28 ఉదయం 10:10 గంటలకు టీజర్ ను రిలీజ్ చేయడానికి సన్నాహాలు చేస్తున్నారు. సినిమాలోని భారీతనం... మాస్ అంశాలు టీజర్ ద్వారా ఆవిష్కరించి, హైప్ పెరిగేలా ఫ్లాన్ చేసుకుంటున్నారంట. తద్వారా ప్రీ రిలీజ్ బిజినెస్ భారీగా చేయాలన్నదే నిర్మాతల ఫ్లాన్. బాలయ్య కెరియర్లోనే అత్యధిక బడ్జెట్ తో రూపొందుతుండటమే కాదు, స్టైలిష్ గా కూడా రూపొందిస్తున్నారంట.

టెంపర్ తర్వాత వరుసగా జ్యోతిలక్ష్మి, లోఫర్, ఇజం, రోగ్ ఇలా వరస డిజాస్టర్లతో పూరీ డీలా పడి ఉన్నాడు. ఈ నేపథ్యంలో పూరీకి బ్లాక్ బస్టర్ ఖచ్ఛితంగా అవసరం. అందుకే మేకింగ్ దగ్గరి నుంచి ప్రతీ విషయంలో చాలా జాగ్రత్తలు తీసుకుంటున్నాడని సమాచారం. శ్రీయా, ముస్కాన్ హీరోయిన్లుగా నటిస్తున్న ఈ చిత్రానికి అనూప్ సంగీతాన్ని అందిస్తుండగా, బాలయ్య ఓ పాట కూడా పాడాడు. దసరా సందర్భంగా పైసా వసూల్ రిలీజ్ కానున్న విషయం తెలిసిందే.