కట్టప్ప సారీ చెబితేనే బాహుబలి-2 రిలీజ్

Posted: 04/20/2017 12:19 PM IST

Satyaraj apology link with baahubali 2 release

అప్పుడెప్పుడో ఆవేశంగా కోలీవుడ్ నటుడు సత్యరాజ్ చేసిన వ్యాఖ్యలు ఇప్పుడు బాహుబలిని కష్టాల్లో నెట్టేస్తున్నాయి. రిలీజ్ డేట్ దగ్గర పడుతున్న సమయంలో కొన్నాళ్ల క్రితం కావేరీ నదీజలాల ఇష్యూపై నిరసన సందర్భంగా సత్యరాజ్ కన్నడగుడిలను కుక్కలతో కంపేర్ చేస్తూ కామెంట్లు చేశాడు. దీనిపై మండిపడ్డ ఉన్న అక్కడి ప్రజలు అదను కోసం ఎదురు చూసి ఇప్పుడు కట్టప్ప రూపంలో రివెంజ్ తీర్చుకోవాలనుకుంటున్నారు.

సినిమాను అడ్డుకుంటామని, అవసరమైతే థియేటర్లను తగలబెడతామని కొందరు హెచ్చరించిన విషయం తెలిసిందే. దీంతో రంగంలోకి దిగిన రాజమౌళి పరిస్థితిని చక్కదిద్దేందుకు యత్నిస్తున్నప్పటికీ వీలుకావటం లేదు. ముఖ్యంగ కర్ణాటక రక్షణ వేదిక ఈ విషయంలో మొండిపట్టుదలతో ఉంది. బాహుబలి-2 రిలీజ్ తేదీ ఏప్రిల్ 28న ఏకంగా బెంగళూరు మరియు చుట్టుపక్కల ఏరియా బంద్ కు పిలుపునిచ్చింది.

తమ ఆత్మగౌరవాన్ని కించపరిచేలా కామెంట్లు చేసిన సత్యరాజ్, క్షమాపణలు చెబితేనే రిలీజ్ గురించి పునరాలోచిస్తామని ప్రకటించింది. దీనికి కన్నడ ఫిల్మ్ ఛాంబర్ కూడా మద్ధతు తెలిపింది. డిస్ట్రిబ్యూటర్లు బలవంతంగా రిలీజ్ చేయాలని యత్నిస్తే పరిస్థితి మరోలా ఉంటుందని హెచ్చరించింది కూడా. మరి ఈ విషయంలో కట్టప్ప కాంప్రమైజ్ అయి సారీ చెబుతాడా? క్షమాపణ చెబితే, తమిళనాడులో వ్యవహారం తేడా కొట్టేలా ఉంది. ఓవరాల్ గా కట్టప్ప వ్యవహారం కరవమంటే కప్పకు, విడవమంటే పాముకి కోపం అన్న చందాన తయారయ్యింది.

దయచేసి అడ్డుకోవద్దు...

ఇదిలా ఉంటే బాహుబలి-2 రిలీజ్ ను అడ్డుకోవద్దంటూ రిక్వెస్ట్ రాజమౌళి కాసేపటి క్రితం తన ట్విట్టర్ లో ఓ వీడియో పోస్ట్ ఉంచాడు. కన్నడలో మాట్లాడిన రాజమౌళి సినిమాలో ఒక్క సత్యరాజ్ మాత్రమే లేడని, యావత్ చిత్ర యూనిట్ ఏళ్ల కష్టం ఉందని, రిలీజ్ ను అడ్డుకుంటే కోట్లలో నష్టం వాటిల్లుతుందని రిక్వెస్ట్ చేశాడు.