గౌతమీపుత్ర శాతకర్ణి రిలీజ్ స్పెషల్

Posted: 01/11/2017 12:48 PM IST

తన వందో చిత్రం ప్రతిష్టాత్మకంగా తెరకెక్కుతున్న శాతకర్ణి ప్రమోషన్ లో బాలయ్య బిజీగా ఉన్నాడు. 'నాకు గౌతమిపుత్ర శాతకర్ణి ఎంత ముఖ్యమో.. చిరంజీవికి ఖైదీ నంబర్ 150 కూడా అంతే. రెండు సినిమాలు ప్రేక్షకులను అలరించాలని.. రెండూ విజయవంతం కావాలని కోరుకుంటున్నా. ఈ సంక్రాంతి తెలుగు సినీ ప్రేక్షకులకు మంచి విందు భోజనం కావాలని ఆశిస్తున్నా' అంటూ ఓ ప్రకటన చేసి ఆకట్టుకున్నాడు కూడా.

సినిమాకు కూడా స్పెషల్ స్క్రీనింగ్స్ ఏర్పాటు చేయటంతో శాతకర్ణిపై కూడా అంచనాలు అమాంతం పెరిగిపోయాయి. విడుదలకు.. ఇంకా పట్టుమని కొద్ది గంటల టైం ఉందంతే. శాతకర్ణి మూవీకి సంబంధించిన కొత్త అప్ డేట్స్ ఫ్యాన్స్ కి మరింత ఉత్సాహం అందిస్తున్నాయి. మునుపెన్నడూ లేని విధంగా ప్రమోషన్స్ లో భాగంగా బాలయ్య తెగ ఉత్సాహంగా పాల్గొనటం చెప్పుకోదగింది.

శాతావాహనుల్లో శ్రేష్ఠుడు, దేశాన్ని పాలించిన ఓ తెలుగు చక్రవర్తి, తెలుగువాడికి తెలియని తెలుగోడి చరిత్రను చాలా రిసెర్చి చేసి తీశాడు దర్శకుడు క్రిష్. మైల్ స్టోన్ సినిమాల విషయంలో రిస్క్ చేయటం మంచిది కాదని ఎంత వారించినా.. కథ, పైగా దర్శకుడి మీద నమ్మకంతో తాను ముందుకు వచ్చానని ఇప్పటికే బాలయ్య చాలాసార్లు చెప్పుకోచ్చాడు. హేమామాలిని, కబీర్ బేడీ లాంటి సీనియర్ నటులతో పోటాపోటీ డైలాగులు చెప్పి బసవతారకరామ పుత్రుడు ఆకట్టుకుంటాడని క్రిష్ తెలిపాడు.

తెలుగు దర్శకుల్లో ఉన్న అత్యంత సున్నితమైన కంటెంట్ ను ఆవిష్కరించే సత్తా ఉన్న ఏకైక దర్శకుడు రాధాకృష్ణ జాగర్లమూడి. వీరత్వానికి, డైలాగ్ డెలివరికీ మారు పేరు బాలయ్య. ఈ ఇద్దరి కాంబో చరిత్రలోని ఓ గాథతో టాలీవుడ్ లో నూతన అధ్యయనం లిఖించేందుకు సిద్ధమైపోతుంది. గ్రాండ్ విజువల్స్, భారీ హంగులతో రాబోతున్న ఈ సాంఘిక చిత్రానికి ప్రేక్షకులు ఏ రేంజ్ లో బ్రహ్మరథం పట్టబోతున్నారో కాసేపట్లో మరి కొద్ది గంటల్లోనే తెలిసిపోనుంది.