ఆయనతో హిట్టు కిక్కించిందట

Posted: 05/05/2016 10:29 AM IST

కమర్షియల్ మాస్ చిత్రాల దర్శకుడు బోయపాటి శ్రీను దర్శకత్వంలో గీతా ఆర్ట్స్ బ్యానర్ పై నిర్మాత అల్లు అరవింద్ నిర్మించిన తాజా చిత్రం ‘సరైనోడు’. స్టైలిష్ స్టార్ అల్లు అర్జున్, రకుల్ ప్రీత్ సింగ్, కెథరిన్ థ్రెసా హీరోహీరోయిన్లుగా నటించిన ఈ సినిమా ఇటీవలే విడుదలై మంచి విజయం సాధించింది. బాక్సాఫీస్ వద్ద కలెక్షన్ల మోత మోగిస్తోంది. ఈ సినిమాను విజయం చేసినందుకు ప్రేక్షకులకు థ్యాంక్స్ చెబుతూ చిత్ర యూనిట్ విజయవాడలో నిన్న విజయోత్సవ వేడుకను నిర్వహించారు.

ఈ కార్యక్రమంలో అల్లు అర్జున్, రకుల్ ప్రీత్ సింగ్, కెథరిన్ థ్రెసా, ఆది పినిశెట్టి, శ్రీకాంత్, బోయపాటి శ్రీను, అల్లు అరవింద్ మరియు తదితరులు పాల్గొన్నారు. ఈ సందర్భంగా బన్నీ మాట్లాడుతూ.... నాకు మొదటి నుంచి అన్ని విధాల అండగా నిలబడుతూ వచ్చిన మెగా అభిమానులందరికీ ప్రత్యేక కృతజ్ఞతలు. ఈ సినిమాను మంచి విజయం చేసినందుకు సంతోషంగా వుంది. బోయపాటి శ్రీను గారు నన్ను ఓ మాస్ హీరోగా చూపించారు. ఓ సినిమా విజయం సాధించాలంటే దర్శకుడి తర్వాతే ఎవరైనా. ఈ సినిమా సక్సెస్ క్రెడిట్ ముందుగా బోయపాటి గారికే దక్కాలి. ఇక నాన్న(అల్లు అరవింద్), ఓ నిర్మాతగా కాకుండా ఓ తండ్రిగా ఈ సినిమా కోసం కష్టపడ్డారు. ఆయనతో కలిసి ఇంత పెద్ద హిట్ కొట్టడం సంతోషంగా వుంది అని తెలిపారు. ఈ వేడుక చివర్లో బన్నీ, రకుల్, కెథరిన్ లు డాన్స్ చేసి ప్రేక్షకులను అలరించారు.