భారీ క్రేజ్ దక్కించుకున్న ‘జై బాలయ్య’ టాటూ

Posted: 11/28/2015 11:04 AM IST

‘భలే భలే మగాడివోయ్’ తర్వాత నాని హీరోగా ‘అందాల రాక్షసి’ ఫేం దర్శకుడు హను రాఘవపూడి దర్శకత్వంలో ఓ చిత్రం తెరకెక్కుతోంది. 14 రీల్స్ ఎంటర్టైన్మెంట్ బ్యానర్ పై ప్రముఖ నిర్మాతలు రామ్ ఆచంట – గోపి ఆచంట – అనిల్ సుంకర సంయుక్తంగా నిర్మిస్తున్నారు. ప్రస్తుతం ఈ చిత్ర షూటింగ్ చివరి దశకు చేరకుంది. విశాల్ చంద్రశేఖర్ సంగీతం అందిస్తున్నారు.

ఈ సినిమాలో నాని అనంతపూర్ నందమూరి బాలకృష్ణ ఫ్యాన్స్ అసోసియేషన్ ప్రెసిడెంట్ పాత్రలో కనిపించనున్నాడు.. అందువల్ల ఈ చిత్రానికి ‘జై బాలయ్య’ అనే టైటిల్ ను చిత్ర యూనిట్ పరిశీలిస్తున్నారు. అంతేకాకుండా ఈ సినిమా కోసం నాని తన చేతిమీద ‘జై బాలయ్య’ అనే ఓ టాటూను కూడా వేయించుకున్నాడు.

ప్రస్తుతం ఈ టాటూకి భారీగా క్రేజ్ పెరిగిపోయింది. నిన్న ‘సైజ్ జీరో’ సినిమా ప్రీమియర్ షోకు నాని వెళ్లాడు. అక్కడ నాని చేతిపై వున్న ఈ టాటూ ఫోటో ప్రస్తుతం సోషల్ మీడియాలో హల్చల్ చేస్తోంది. బాలయ్య అభిమానులంతా ఈ టాటూను వేయించుకునేందుకు ప్రయత్నాలు మొదలుపెట్టారు. మొత్తానికి నాని తన ప్రమోషన్ కార్యక్రమాలను ఇప్పటినుంచే ప్రారంభించినట్లుగా కనిపిస్తోంది.