కన్ఫర్మ్: యంగ్ టైగర్ తో మలయాళ సూపర్ స్టార్ ఢీ

Posted: 11/26/2015 11:58 AM IST

ప్రిన్స్ మహేష్ బాబుతో ‘శ్రీమంతుడు’ వంటి భారీ బ్లాక్ బస్టర్ హిట్ చిత్రాన్ని నిర్మించి, తొలి విజయాన్ని సొంతం చేసుకున్న సంస్థ మైత్రీ మూవీ మేకర్స్. ‘శ్రీమంతుడు’ తర్వాత ఈ బ్యానర్ లో యంగ్ టైగర్ ఎన్టీఆర్ హీరోగా కొరటాల శివ దర్శకత్వంలో ఓ చిత్రం తెరకెక్కుతున్న విషయం తెలిసిందే. ఈ చిత్రానికి ‘జనతా గ్యారేజ్’ వర్కింగ్ టైటిల్.

‘మిర్చి’, ‘శ్రీమంతుడు’ సినిమాల హిట్టుతో ఫుల్ జోష్ లో వున్న కొరటాల శివ.. ఈ సినిమాలో ఎన్టీఆర్ క్యారెక్టర్ ను చాలా స్టైలిష్ అండ్ సింపుల్ మాసివ్ లుక్ లో చూపించనున్నాడని తెలిసింది. అంతేకాకుండా ఎన్టీఆర్ తో పోటీపడే క్యారెక్టర్ ఇందులో కీలకమని తెలిసింది. ఈ క్యారెక్టర్ కోసం చాలా మంది అగ్ర హీరోలను అనుకున్నప్పటికీ చివరకు మలయాళ సూపర్ స్టార్ ను ఖరారు చేసారు.

తాజాగా ఈ విషయాన్ని చిత్ర నిర్మాతలు ప్రకటిస్తూ.. ఇందులో మలయాళ సూపర్ స్టార్ మోహన్ లాల్ ఓ ప్రధాన పాత్రలో నటించనున్నాడని తెలియజేసారు. ప్రస్తుతం ఈ ప్రాజెక్టుకు సంబంధించిన ప్రీ ప్రొడక్షన్ వర్క్స్ జరుగుతున్నాయి. వచ్చే ఏడాది ఫిబ్రవరిలో ఈ ప్రాజెక్టు సెట్స్ పైకి వెళ్లనుంది. ఈ సినిమాకు దేవిశ్రీప్రసాద్ సంగీతం అందించనున్నాడు.

ప్రస్తుతం ఎన్టీఆర్ నటిస్తున్న ‘నాన్నకు ప్రేమతో’ సినిమా షూటింగ్ శరవేగంగా జరుగుతోంది. సుకుమార్ దర్శకత్వంలో తెరకెక్కుతున్న ఈ చిత్రంలో రకూల్ ప్రీత్ సింగ్ హీరోయిన్ గా నటిస్తుంది. ఇటీవలే విడుదలైన ఫస్ట్ లుక్ పోస్టర్లు, టీజర్లకు భారీ రెస్పాన్స్ వస్తోంది. వచ్చే ఏడాది సంక్రాంతి కానుకగా ఈ చిత్రాన్ని విడుదల చేయడానికి సన్నాహాలు చేస్తున్నారు.