‘బ్రూస్ లీ’ సెట్లో బాలీవుడ్ బాద్షా సడెన్ ఎంట్రీ

Posted: 10/07/2015 05:12 PM IST

శ్రీనువైట్ల దర్శకత్వంలో మెగాపవర్ స్టార్ రాంచరణ్ తేజ, రకూల్ ప్రీత్ సింగ్ జంటగా నటిస్తున్న తాజా చిత్రం ‘బ్రూస్ లీ - ది ఫైటర్’. డివివి ఎంటర్ టైన్మెంట్స్ బ్యానర్ పై ప్రముఖ నిర్మాత డివివి దానయ్య నిర్మిస్తున్నారు. ఎస్.ఎస్.థమన్ సంగీతం అందించారు.

థమన్ సంగీతం అందించిన పాటలు ఇటీవలే విడుదలై భారీ బ్లాక్ బస్టర్ హిట్టయ్యాయి. ఇందులోని ‘మెగా మీటర్...’ పాట దుమ్మురేపుతోంది. ఇదిలా వుంటే తాజాగా ఈ చిత్ర సెట్స్ లోకి బాలీవుడ్ బాద్ షా షారుక్ ఖాన్ అనుకోకుండా ఎంట్రీ ఇచ్చి, అందరికీ ఫుల్ జోష్ ను అందించారు.

ప్రస్తుతం ఈ సినిమాలోని టైటిల్ సాంగ్ ను చిత్రీకరిస్తున్నారు. ఈ సాంగ్ సెట్ లోకి షారుక్ సడెన్ ఎంట్రీ ఇవ్వడంతో ఒక్కసారిగా అందరూ షాక్ అయ్యారు. దీంతో ‘బ్రూస్ లీ - ది ఫైటర్’ చిత్ర యూనిట్ లో ఓ ఆనందం వచ్చింది. ఈ సమయంలో చిత్ర యూనిట్ తో పాటుగా చరణ్ భార్య ఉపాసన కూడా అక్కడే వుండి, సరదాగా అందరూ షారుక్ తో ముచ్చటించారు.

అంతే కాకుండా చరణ్ డాన్సులు చూసి షారుక్ ఫిదా అయ్యారు. షారుక్ డాన్సింగ్ స్టైల్ బాగుందంటూ ప్రశంసించారు. భారీ అంచనాలతో రూపొందుతున్న ఈ చిత్రానికి ప్రముఖ రచయితలు కోన వెంకట్, గోపి మోహన్ లు కథను అందిస్తున్నారు. తమిళంలోకి ‘బ్రూస్ లీ2’ పేరుతో విడుదల చేయనున్నారు.

పవర్ ఫుల్ యాక్షన్, ఫ్యామిలీ ఎంటర్ టైనర్ గా రూపొందుతున్న మెగాస్టార్ చిరంజీవి ఓ స్పెషల్ పాత్రలో నటించారు. కృతి కర్బందా, నదియా ముఖ్య పాత్రలలో నటించారు.ఈ చిత్రాన్ని అక్టోబర్ 16న ప్రపంచ వ్యాప్తంగా ఘనంగా విడుదల చేయడానికి చిత్ర యూనిట్ సన్నాహాలు చేస్తున్నారు. త్వరలోనే అన్ని వివరాలు అధికారికంగా ప్రకటించనున్నారు.