సేవ చేసేందుకే వచ్చాను.. రాజకీయం కోసం కాదు..

Posted: 03/25/2015 07:33 PM IST

మా ఎన్నికలు రసభసగా మారాయి. అధ్యక్ష పదవికి ఏకగ్రీవంగా ఎన్నుకోబడతారని అనుకుంటే... పోటీ ఏర్పడి... ఆ పోటి ప్రస్తుతం రెండు గ్రూపులు, వ్యక్తిగత విషయాల్లో గొడవలు పెంచే విధంగా మారాయి. ‘మా’ అధ్యక్ష పదవి కోసం నటుడు రాజేంద్రప్రసాద్, నటి జయసుధలు పోటీ పడుతున్న విషయం తెలిసిందే.

రాజేంద్రప్రసాద్ కు మద్ధతు పలుకుతూ నటుడు నాగబాబు, శివాజీరాజా తదితరులు ఓ ప్రెస్ మీట్ పెట్టి పలు వ్యాఖ్యలు చేసారు. రాజేంద్రప్రసాద్ ప్యానెల్ చేసిన కామెంట్లకు కౌంటర్ గా నిన్న జయసుధ ప్యానెల్ సభ్యులు విరుచుకుపడ్డారు. రాజేంద్రప్రసాద్ ప్యానెల్ సభ్యులపై భారీగా కామెంట్లు చేసారు.

తనను ఈ పోటీలో పాల్గొనవద్దని పలువురితో చెప్పించడం కూడా జరిగిందని జయసుధ మీడియా ముఖంగా చెప్పుకొచ్చింది. అలాగే నటి హేమ కూడా పలు వ్యాఖ్యలు చేసారు. అయితే ఈ వ్యాఖ్యలన్నీ కూడా రాజేంద్రప్రసాద్ ప్యానెల్ సభ్యులను ఉద్దేశించి మాట్లాడినవే అని తెలిసిందే.

అయితే జయసుధ ప్యానెల్ వారు రాజేంద్రప్రసాద్ మరియు నాగబాబులపై చేసిన కామెంట్లకు తాజాగా రాజేంద్రప్రసాద్ ప్యానెల్ సభ్యులు స్పందించారు. ఈ విషయంపై రాజేంద్రప్రసాద్ మాట్లాడుతూ...‘మా’లో మార్పు కోసం, సేవ చేయడానికే తాను ఈ అధ్యక్ష పదవికి పోటీ చేయాలనుకున్నాను. అందుకే వచ్చాను. ఈ విషయంపై సినీ పెద్దలను కలిసాను. వారు సానుకూలంగా స్పందించారు.

తనతో పోటీ చేయగల స్థాయి ఈ తెలుగు సినీపరిశ్రమలో ఎవడికి లేదు. ఈ ‘మా’ ఎన్నికలు ధర్మయుద్ధం లాంటిది. మంచి చేయడానికి నేను పోటీలో దిగడమే పాపం అయితే... ఆ పాపాన్ని నేను మూటగట్టుకుంటాను. జయసుధని ఢిల్లీ నుంచి ఓ మహాశక్తి నడిపిస్తోంది. ఆ శక్తి ఢిల్లీ నుంచే చక్రం తిప్పుతానంటోందని ఆయన చెప్పుకొచ్చారు.

అలాగే... ఇక్కడ పురుషాదిక్యత అనే ఆరోపణలు చేసారు.. అసలు పురుషాదిక్యత ఏంటి? అలా పురుషాదిక్యత చేసి వుంటే సావిత్రి గారి నుంచి మీలాంటి సహజనటి వరకు అందరిని ఆదరించారు కదా! రాజకీయాలతో మూవీ ఆర్టిస్ట్స్ అసోసియేషన్‌ని కంపు చేశారు. సినిమాల్లో పనిలేకే ఇక్కడ కుట్రలు చేస్తున్నారు అని అన్నారు. అలాగే బెదిరింపులకు పాల్పడిన వారిని కళాకారులు అని అనరు.. శాడిస్టులు అని అంటారు అని చెప్పుకొచ్చారు.

మా సభ్యులకు తాను సెల్ ఫోన్లు పంచిపెడుతున్నారని జయసుధ ప్యానెల్ సభ్యులు ఆరోపణలు చేసారు. మా సభ్యులకు సెల్ ఫోన్లు పంచిపెడితే అవి తీసుకుని ఓట్లు వేసేంత నీచస్థాయిలో సినిమా కళాకారులు వున్నారా అని రాజేంద్రప్రసాద్ ప్రశ్నించారు. పదిమందిని నవ్వించి ఇంతదూరం వచ్చినవాడిని ఇప్పుడిలా చీప్ ట్రిక్స్‌కి పాల్పడి ఓట్లు దండుకోవాల్సిన అవసరం తనకు లేదని తేల్చిచెప్పారు.