అమితాబ్ ను వరించిన అక్కినేని

Posted: 09/21/2014 01:07 PM IST

బిగ్ బి అమితాబ్ బచ్చన్ మరో గౌరవం దక్కించుకున్నారు. ప్రతి ఏటా ఇస్తున్న అక్కినేని జాతీయ అవార్డు ఆయనను వరించింది. 2013 సంవత్సరానికి గాను ఈ అవార్డును అమితాబ్ కు ఇస్తున్నట్లు అవార్డు కమిటీ చైర్మన్ టి. సుబ్బిరామిరెడ్డి ప్రకటించారు. ఈ పురస్కారం కింద రూ.5లక్షల నగదుతో పాటు.., ప్రశంసాపత్రం ఇవ్వటం జరుగుతుంది. ఈ కార్యక్రమంతో త్వరలో శిల్పకళావేదికలోనే జరుగుతుందని సుబ్బిరామిరెడ్డి తెలిపారు. 2005 సంవత్సరం నుంచి ప్రతి ఏటా ఈ అవార్డును సిని రంగంలో విశేషంగా కృషి చేసిన వారికి అందజేస్తున్నారు.

ప్రతి సంవత్సరం ప్రారంభంలో అవార్డును ఇచ్చేవారు. అయితే ఈ సారి అక్కినేని నాగేశ్వర రావు మరణంతో అవార్డు ఎంపికలో కాస్త జాప్యం జరిగినట్లు అవార్డు కమిటీ చైర్మన్ వెల్లడించారు. ఇకపై వచ్చే ఏడాది నుంచి ఈ అవార్డును అక్కినేని నాగేశ్వ రరావు జయంతి అయిన సెప్టెంబర్ 20న అందిస్తామని ఆయన స్పష్టం చేశారు. ఇప్పటివరకు ఈ అవార్డును షబానా అజ్మి, అంజలీదేవి, దేవానంద్, వైజయంతి మాలా, లతా మంగేష్కర్, హేమా మాలిని, శ్యాం బెనగల్, బాలచందర్ సహా ఇతర ప్రముఖులు అందుకున్నవారిలో ఉన్నారు.

కార్తిక్