ఆపదలో వెంకటేష్ కోసం దిగివచ్చిన పవన్

Posted: 09/19/2014 04:06 PM IST

పవర్ స్టార్ మంచితనం గురించి తెలియనిది ఎవరికి చెప్పండి. మంచి నటుడుగానే కాకుండా.., మంచి వ్యక్తిత్వం ఉన్న మనిషిగా పవన్ పేరు తెచ్చుకున్నాడు. తోటి వారిని ఎంకరేజ్ చేయటంలో పవన్ ముందుంటాడని అందరికి తెలుసు. ఇప్పుడు ఆపదలో ఉన్న విక్టరీ వెంకటేష్ ను పవన్ కళ్యాణ్ కాపాడుతున్నాడు. అది కూడా ఎలాంటి సంబంధం లేని ఓ మహిళ కోరినందుకు. అయితే ఇదంతా కేవలం సినిమాలో..,. వీరిద్దరి కాంబినేషన్లో త్వరలో వస్తున్న ‘‘గోపాల గోపాల’’ అనే సినిమా కధ ఇది. ప్రస్తుతం రామోజి ఫిలిం సిటిలో సినిమా షూటింగ్ జరుగుతోంది.

కధను ఓ సారి చూస్తే..,

ఈ సినిమాలో శ్రియ హీరోయిన్ గా నటిస్తోంది. ఇందులో పవన్ శ్రీకృష్ణుడుగా నటిస్తున్నాడు. పవన్ (శ్రీకృష్ణుడు)కి శ్రియా భక్తురాలు. అలాంటి భక్తురాలికి ఒక సమయంలో అనుకోని ఆపద వచ్చింది. అదేమంటే ఆమె భర్త (వెంకటేష్) కష్టాల్లో ఇరుక్కుంటాడు. ఎంత ప్రయత్నించినా వాటిని అధిగమించలేక ఇబ్బందులు పడుతుంటాడు. ఈ సమయంలో భర్తకు సాయం చేయాలని శ్రియా శృకృష్ణుడిని వేడుకుంటుంది. భక్తురాలి కోరికను మన్నించి.., ఆమె ముందు పవన్ ప్రత్యక్షమై.. తాను కాపాడుతానని భరోసా ఇస్తాడు. ఇక పవన్ ఎలా వెంకటేష్ ను కాపాడుతాడు అనేది పూర్తి కధ.

హిందీలో వచ్చిన ‘ఓ మై గాడ్’ ఆధారంగా ఈ సినిమా ను తీస్తున్నారు. పవన్ ‘‘అత్తారింటికి దారేది’’, వెంకటేష్ ‘‘దృశ్యం’’ సినిమాలు ఘన విజయం సాధించాయి. అలాంటిది ఇద్దరూ కలిసి ఒకే సినిమాలో నటిస్తుండటంతో అంచనాలు మరింత పెరిగాయి. వచ్చే ఏడాది ప్రారంభ పండగ అంటే సంక్రాంతికి ఈ సినిమాను విడుదల చేసేందుకు సిద్ధం చేస్తున్నారు. ఇద్దరు గోపాలుడులు కలిస్తే.., గోకులంలో ఏం జరుగుతుందో చూడాలంటే మరో నాలుగు నెలలు ఆగాల్సిందే. 

 

కార్తిక్