రాష్ట్రంలో ఆరు ప్రాజెక్టులకు రూ.10వేల కోట్ల రుణ ప్రతిపాదన

Posted: 11/13/2013 01:13 PM IST

ఇండియా ఇన్‌ఫ్రాస్ట్రక్చర్‌ ఫైనాన్స్‌ కంపెనీ (ఐఐఎఫ్‌ఎసి)కి రాష్ట్రంలోని ఆరు ప్రాజెక్టులకు 10 వేల కోట్ల రుణాలు కోరుతూ ప్రతిపాదనలు వచ్చాయని ఆ సంస్థ సిఎండి డాక్టర్‌ హర్ష్‌ కుమార్‌ భన్వాలా చెప్పారు. ఇప్పటికే 8 ప్రాజెక్టులకు రూ.18,674 కోట్లు మంజూరు చేశామని తెలిపారు. అలాగే హైదరాబాద్‌ మెట్రో రైల్‌ ప్రాజెక్టుకు వెయ్యి కోట్ల రుణం కోరుతూ ప్రతిపాదనలు వచ్చాయని, వీటిని అధ్యయనం చేస్తున్నామని ఆయన చెప్పారు.

 

తమ సంస్థ 700 మిలియన్‌ డాలర్ల రుణాన్ని విదేశీ సంస్థల నుంచి తీసుకుంటుందని చెప్పారు. బ్యాంకుల కన్నా ఆ సంస్థ ఇచ్చే రుణాలపై వడ్డీ తక్కువ శాతం ఉంటుందని, దీంతో భారీ సంస్థలు, కంపెనీలు తమవైపే మొగ్గు చూపుతున్నాయని ఆయన అన్నారు. తమ సంస్థ కన్‌సార్టియం కంపెనీలకు ఎక్కవ రుణాలిస్తుందని, ఇందులో ఎక్కువగా దీర్ఘకాలిక రుణాలే ఉంటాయని ఆయన చెప్పారు. సంస్థలకు నేరుగా రుణాలిస్తామని, అలాగే బ్యాంకుల ద్వారా రీఫైనాన్స్‌ చేస్తామని ఆయన వివరించారు.

 

ఢిల్లీ -ముంబయి పారిశ్రామిక కారిడార్‌లో నెలకొల్పే ప్రాజెక్టులకు రుణాలిస్తున్నామని హర్షకుమార్‌ వివరించారు. తమ సంస్థ 2012- 13 నాటికి రూ.40,670 కోట్ల రుణాలు మంజూరు చేసినట్లు తెలిపారు. ఈ రుణాలపై తమ సంస్థ రూ.1,009 కోట్ల లాభం ఆర్జించి కేంద్ర ప్రభుత్వానికి రూ.221 కోట్లు డివిడెండ్‌ చెల్లించిందని హర్ష్‌కుమార్‌ తెలిపారు. ఈ ఆర్థిక సంవత్సరం తమ సంస్థ క్రెడిట్‌ పోర్ట్‌పోలియో రూ. 50,000 కోట్లకు చేరుకుంటుందని ఆయన పేర్కొన్నారు. తమ సంస్థ ఇచ్చిన రుణాల్లో 45 శాతం రోడ్ల నిర్మాణాలు, 40 శాతం ఇంధన ప్రాజెక్టులు, మిగిలిన 15 శాతం రుణాలు పోర్టులు, ఎయిర్‌పోర్టు తదితర రంగాలకు మంజూరు చేస్తున్నామని చెప్పారు.