స్విస్ కుందనానికి భలే గిరాకీ.. ట్రిలియన్ చేరువలో దిగుమతులు

Posted: 12/15/2014 05:00 PM IST

స్విట్జర్లాండ్ కుందనానికి గత కొంత కాలంగా దేశీయంగా భలే గిరాకీ లభిస్తోంది. స్విస్ బంగారానికి దేశీయంగా మంచి ఆదరణ లభిస్తుండటంతో క్రమంగా దిగుమతులు కూడా బాగా పుంజుకున్నాయి. ప్రస్తుత సంవత్సరంలో (2014) ఇప్పటివరకూ దిగుమతైన పసిడి విలువ రూ. లక్ష కోట్ల(ట్రిలియన్) సమీపానికి చేరింది. దేశీయంగా లక్ష కోట్ల రూపాయల స్థాయిలో ఇందుకు అక్టోబర్ నెల కూడా జత కలిసింది. అక్టోబర్‌లో స్విస్ నుంచి దేశానికి రూ. 18,000 కోట్ల(2.8 బిలియన్ ఫ్రాంక్‌లు) విలువైన బంగారం దిగుమతి అయ్యింది. అంతకుముందు ఆగస్ట్‌లోనూ 2.2 బిలియన్ స్విస్ ఫ్రాంక్‌ల విలువైన దిగుమతులు నమోదుకావడం గమనార్హం.

ఈ గణాంకాలను స్విస్ కస్టమ్స్ పాలనా విభాగం తాజాగా విడుదల చేసింది. దీంతో జనవరి మొదలు అక్టోబర్ చివరివరకూ మొత్తం 14.2 బిలియన్ స్విస్ ఫ్రాంక్‌ల(రూ. 93,000 కోట్లు) విలువైన బంగారం దేశానికి దిగుమతి అయ్యింది. పసిడి ట్రేడింగ్ ద్వారా దేశంలోకి నల్లధనం దిగుమతి అవుతోందన్న ఆందోళనల నేపథ్యంలో ఈ గణాంకాలకు ప్రాధాన్యత ఏర్పడింది.

జి.మనోహర్