చర్మం తాజాగా వుండాలంటే.. ఈ చిట్కాలు పాటించండి

Posted: 10/08/2015 01:30 PM IST

ఉదయం లేచినప్పటి నుంచి రాత్రి పడుకునేదాకా ప్రతిఒక్కరు పనిలో నిమగ్నమైపోయి వుంటారు. ఇంటి పనులతోపాటు ఆఫీసు కార్యకలాపాల్ని నిర్వహించుకోవడంలో సమయం గడిచిపోతుంది కాబట్టి.. చర్మం చాలా డల్ గా, పాలిపోయినట్లుగా అనిపిస్తుంది. అలాంటప్పుడు చర్మం తిరిగి తాజాగా వుండాలంటే.. కొన్ని చిట్కాలు పాటిస్తే చాలని నిపుణులు అంటున్నారు. ప్రోడక్టులు చర్మానికి సహజత్వం అందించవు కాబట్టి.. వాటికంటే సహజ చిట్కాలు రెగ్యులర్ పాటిస్తే సరిపోతుందని వాళ్లు చెబుతున్నారు. ఈ చిట్కాలతో చర్మం సౌందర్యంగా తయారవడమే కాకుండా సహజత్వం కోల్పోకుండా ఎంతో మృదువుగా, చాలా సాఫ్టుగా వుంటుంది. మరి.. ఆ చిట్కాలేంటో తెలుసుకుందామా..

* మూడు చెంచాల గంధం పొడిలో రెండు చెంచాల గులాబీ నీళ్లు వేసి బాగా కలుపుకోవాలి. ఈ మిశ్రమాన్ని ముఖానికి రాసుకోవాలి. పావు గంటయ్యాక తడిపి మర్దన చేసుకోవాలి. కాసేపయ్యాక కడిగేసుకుంటే చర్మం మీది మురికి తొలగిపోతుంది.
* రెండు చెంచాల గంధం పొడిలో చెంచా పసుపూ, మూడు చెంచాల తేనె వేసి బాగా కలుపుకోవాలి. ఈ మిశ్రమాన్ని ముఖానికి పూతలా వేసుకోవాలి. 20 నిమిషాలయ్యాక చన్నీళ్లతో కడిగిస్తే చర్మం తాజాగా మారుతుంది.
* బంగాళాదుంపల్ని కాసేపు నానేసి.. మెత్తగా గుజ్జు చేయాలి. తర్వాత ఫ్రిజ్‌లో ఉంచి పావుగంటయ్యాక తీసి ముఖానికి మాస్క్‌లా వేసుకోవాలి. అది పొడిగా అయ్యాక శుభ్రపరుచుకుంటే సరిపోతుంది.
* అరకప్పు పుల్లటి పెరుగులో నాలుగు చుక్కల నిమ్మరసం కలిపి ముఖానికి రాసుకోవాలి. పది నిమిషాలయ్యాక గోరు వెచ్చటి నీళ్లతో కడిగేసుకుంటే ముఖం మృదువుగా మారుతుంది.