గులాబీ రేకులతో ముత్యంలాంటి సౌందర్యం..

Posted: 09/03/2015 06:41 PM IST

సువాసనలు వెదజల్లే గులాబీలంటే ప్రతిఒక్కరికీ చాలా ఇష్టం. ముఖ్యంగా అమ్మాయిలు వాటిని అమితంగా ఇష్టపడతారు. ఆ పువ్వులను తమ జడలకు వేసుకున్నప్పడు అవి వారి అందాన్ని మరింత రెట్టింపు చేస్తాయి. అంతేకాదు.. ఇవి సౌందర్యసాధనంగానూ ఉపయోగపడతాయని బ్యూటీషియన్లు అంటున్నారు. ఈ గులాబీ పువ్వుల రేకులు ముఖవర్ఛస్సును పెంచడంతోపాటు చర్మాన్ని ఆరోగ్యంగా వుంచుతాయని వారు చెబుతున్నారు. మరి.. గులాబీ రేకులతో సౌందర్యాన్ని ఎలా మెరుగుపర్చుకోవాలో తెలుసుకుందామా..

* ఒక గ్లాసు నీళ్లు తీసుకుని అందులో పది గులాబీ రేకలను వేసి, గంటపాటు నానబెట్టుకోవాలి. అలా చేయడం వల్ల ఆ గులాబీ రేకులు మెత్తగా తయారవుతాయి. అప్పుడు వాటిని బాగా నలిమి, మెత్తని మిశ్రమంలా చేసుకోవాలి. ఈ మిశ్రమానికి రెండు టీ స్పూన్ల గులాబీ నీళ్లూ, మూడు టీ స్పూన్ల తేనె వేసి బాగా కలుపుకోవాలి. ఈ పేస్తును పావు గంట ప్రిజ్‌లో వుంచిన తర్వాత.. ముఖంపై  వేళ్లతో  వలయాకారంగా పది నిమిషాలపాటు రాయాలి. తరువాత గోరువెచ్చని నీళ్లతో కడిగేయాలి. ఈ విధంగా రెగ్యులర్ గా చేస్తే.. మిళమిళ మెరిసేటి సౌందర్యం మీ సొంతం అవుతుంది.

* గులాబీ పువ్వులు పొడిబారిన చర్మానికి మంచి మాయిశ్చరైజర్‌లా కూడా ఉపయోగపడతాయి. అందుకోసం.. ఒక పాత్రలో పది గులాబీ రేకలను వాటిని మెత్తగా చేసుకోవాలి. అనంతరం అందులో రెండు చెంచాల గులాబీ నీళ్లూ, రెండు చెంచాల తేనె, మూడు చుక్కల బాదం నూనె వేసి బాగా కలుపుకోవాలి. ఈ మిశ్రమాన్ని ముఖంపై వలయాకారంగా రాసుకోవాలి.  పావుగంట తరువాత గోరువెచ్చని నీళ్లతో శుభ్రం చేసుకోవాలి. అంతే.. ఈ విధంగా రెగ్యులర్ గా చేసుకుంటే.. పొడిబారిన చర్మం దూరమవుతుంది. ఫలితంగా చర్మం మృదువుగా మారడంతోపాటు చర్మ సౌందర్యం మరింత మెరుగవుతుంది.

* ముఖంపై ముడతలు తగ్గిపోవాలంటే.. ముందుగా ఎనిమిది గులాబీ రేకలను మెత్తగా చేసి అందులో రెండు చెంచాల గులాబీ నీళ్లూ, చెంచా పెరుగు, చెంచా తేనె వేసి కలపాలి. దీన్ని ముఖానికి ప్యాక్‌లా వేసి పది నిమిషాల తర్వాత కడిగేయాలి. ఇలా కాకపోతే.. పది గులాబీలు, పది పుదీనా ఆకుల్ని మెత్తని మిశ్రమంలా చేయాలి. దీనికి చెంచా గులాబీ నీళ్లూ, గుడ్డులోని తెల్లసొన, చెంచా మొక్కజొన్న పిండి కలపాలి. ఈ మిశ్రమాన్ని ముఖానికి రాసుకుని పావుగంట తరువాత శుభ్రం చేసుకోవాలి. ఇలా తరచూ చేస్తుంటే ముఖంపై ముడతలు తగ్గుముఖం పడతాయి.