చర్మాన్ని కాంతివంతం చేసే నేచురల్ టిప్స్

Posted: 08/20/2015 12:49 PM IST

నేటి ఆధునిక యుగం ఎంత కలుషితమైందో ప్రత్యేకంగా చెప్పుకోవాల్సిన అవసరం లేదు. ఇటువంటి వాతావరణంలో ప్రతిఒక్కరి అందం డీలా పడిపోతుంది. ఉదయం వెళ్లేటప్పుడు ముఖంపై వుండే అందం సాయంత్రానికల్లా మాయమవుతుంది. కాలక్రమంలో మరీ అందవిహీనంగా మారిపోతుంది. ఇలాంటప్పుడు బ్యూటీ ప్రోడక్ట్స్ తో ఉపయోగించి అందం పొందవచ్చు కానీ.. అంతగా ఫలితం వుండదు. చర్మం సహజత్వం కోల్పోవడమే ప్రధాన సమస్య. ఇలాంటి సమస్యను అధిగమించాలంటే బ్యూటీ ప్రోడక్స్ట్ కు బదులు కొన్ని నేచురల్ చిట్కాలు పాటిస్తే చాలు. మరి.. ఆ చిట్కాలేంటో తెలుసుకుందామా..

* వేప : ముందుగా వేపాకులను నీటిలో ఉడకబెట్టాలి. ఆ నీరు చల్లారిన తరువాత ముఖానికి అప్లై చేసుకోవాలి. ఇలా చేయటం వల్ల ముఖం శుభ్రపడుతుంది. అలాగే.. ఒక పాత్రలో కొంచెం వేపాకు పౌడర్‌ను తీసుకొని అందులో గ్రేప్‌సీడ్‌ ఆయిల్‌ వేసి బాగా కలుపుకోవాలి. ఈ మెత్తని మిశ్రమాన్ని ముఖానికి రాసుకోవాలి. పదిహేను నిమిషాల తర్వాత కడిగేసుకోవాలి.

* తేనె-శెనగపిండి-చందనం : ఒక పాత్ర తీసుకుని అందులో తేనె, శెనగపిండి, చందనం, మీగడ తదితరాలను వేసి బాగా కలుపుకోవాలి. మెత్తని పేస్టులా కలిపిన ఈ మిశ్రమాన్ని ముఖానికి పట్టించుకోవాలి. 15 నిముషాల తర్వాత గోరువెచ్చని నీరుతో శుభ్రం చేసుకోవాలి. ఇలా రెగ్యులర్ గా చేస్తే.. చర్మం మృదువుగా అవుతుంది.

* ముల్తానీ మట్టిన : ఒక బౌల్‌లో ముల్తానీ మట్టిని తీసుకొని దానికి కొంచెం తాజా టొమాటో రసం కలపాలి. అనంతరం పసుపు, చందనం పౌడర్‌ను కూడా వేసి బాగా మిక్స్‌ చేయాలి. ఈ పేస్టును ముఖానికి పట్టించుకోవాలి. కాసేపు తర్వాత శుభ్రంగా కడిగేయాలి. ఇలా రెగ్యులర్ గా పట్టిస్తే ముఖంపై ఉండే మచ్చలు తొలగిపోతాయి.

* బియ్యం పిండి-టొమాటో రసం : ఒక పాత్ర తీసుకుని అందులో బియ్యం పిండి, టొమాటో రసం, పాలు, పసుపు తదితర పదార్థాలను వేసి బాగా కలుపుకోవాలి.  మెత్తని పేస్టులా చేసుకున్న తర్వాత ఈ మిశ్రమాన్ని ముఖానికి పట్టించుకోవాలి. కాసేపు తర్వాత గోరువెచ్చని నీటితో శుభ్రం చేయాలి. ఇలా రెగ్యులర్ గా రాస్తే ముడతలు పోతాయి.

* తులసి ఆకుల : ముందుగా తులసి ఆకులను తీసుకుని వాటిని చూర్ణం చేసుకోవాలి. ఇలా చేసిన చూర్ణంలో కొద్దిగా పాలు వేసి బాగా కలుపుకోవాలి. మెత్తని పేస్టులా చేసుకున్న ఈ మిశ్రమాన్ని ముఖానికి పట్టించుకోవాలి. అనంతరం శుభ్రం చేసుకోవాలి. ఇలా రెగ్యులర్ గా చేస్తే.. ఆరోగ్యవంతమైన చర్మం సొంతమవుతుంది.