అందాన్ని పెంచే ఆపిల్ ఫేస్ మాస్కులు

Posted: 08/12/2015 12:56 PM IST

చర్మసౌందర్యాన్ని మెరుగుపరిచే సహజ పండ్లలో ఆపిల్ కూడా ఒకటి. ఈ ఆపిల్ లో విటమిన్ సి, విటమిన్ ఎ, కాపర్, మరికొన్ని స్కిన్ ఫ్రెండ్లీ న్యూట్రీషియన్స్ పుష్కలంగా ఉన్నాయి. అవి చర్మసౌందర్యాన్ని పెంచడంతోపాటు ముఖంమీద వుండే మచ్చలు, ముడతలు, మొటిమలను పూర్తిగా నయం చేయడంలో సమర్థవంతంగా పనిచేస్తాయి. ఇన్ని పోషకాలు నిండిన ఆపిల్ తో వివిధ పదార్థాలలో కలిపి ఫేస్ మాస్కులు చేసుకుంటే.. మరిన్ని ప్రయోజనాలు పొందవచ్చు. మరి.. ఆ ఫేస్ మాస్కులు ఎలా చేస్తారో, వాటివల్ల కలిగే ప్రయోజనాలేంటో తెలుసుకుందామా...

* ఒక బౌల్ తీసుకుని అందులో ఆపిల్ తురుము, అందులో ఒక చెంచా పెరుగు, ఒక చెంచా నిమ్మరసం తదితర పదార్థాలను వేసి బాగా మిక్స్ చేసుకోవాలి. ఈ మిశ్రమాన్ని స్మూత్ గా చేసుకున్న తర్వాత స్కిన్ కు అప్లై చేయాలి. 15నిముషాల తర్వాత ముఖాన్ని చల్లటి నీళ్ళతో శుభ్రం చేసుకోవాలి. దీనిని రెగ్యులర్ గా పట్టిస్తే.. ఆయిలీ స్కిన్ నుంచి ఉపశమనం పొందవచ్చు.

* ఒక పాత్రలో కొద్దిగా ఆపిల్ తురుము, ఒక చెంచా దానిమ్మ రసం వేసి బాగా మిక్స్ చేసుకోవాలి. అనంతరం ఈ మిశ్రమాన్ని ముఖానికి పూర్తిగా పట్టించి, 20 నిముషాలపాటు బాగా ఆరనివ్వాలి. ఆ తర్వాత గోరువెచ్చని నీటితో శుభ్రం చేసుకోవాలి. ఇందులో యాంటీ ఏజింగ్ లక్షణాలు పుష్కలంగా వుంటాయి కాబట్టి.. ఈ రెమెడీ చర్మాన్ని ఇన్ స్టాంట్ గ్లో వస్తుంది.

* ఒక మిక్సింగ్ బౌల్ తీసుకుని అందులో ఆపిల్ తురుము, కొన్ని చుక్కల గ్లిజరిన్ వేసి బాగా కలుపుకోవాలి. పేస్టులా తయారుచేసుకున్న ఈ మిశ్రమాన్ని ముఖానికి అప్లై చేయాలి. 20 నిముషాల తర్వాత గోరువెచ్చని నీటితో శుభ్రం చేయాలి. ఈ విధంగా ఈ ఆపిల్ రెమెడీని రెగ్యులర్ గా ముఖానికి పట్టిస్తే.. డ్రై స్కిన్ సమస్య నుంచి విముక్తి పొందవచ్చు.

* ఆపిల్ ముక్కలను సన్నగా తరిగి, అందులో తేనె, పెరుగు వేసి బాగా మిక్స్ చేసుకోవాలి. మెత్తని పేస్టులా చేసుకున్న ఈ మిశ్రమాన్ని ముఖానికి పట్టించాలి. 20 నిముషాల తర్వాత గోరువెచ్చని నీటితో శుభ్రం చేసుకోవాలి. గ్రీన్ ఆపిల్లో విటమిన్స్, నేచురల్ యాసిడ్స్ ఉండటం వల్ల.. చర్మంను తెల్లగా, కాంతివంతంగా మారుతుంది.

* ఒక పాత్ర తీసుకుని అందులో ఆపిల్ తురుము, తేనె వేసి బాగా మిక్స్ చేసుకోవాలి. ఈ పేస్ట్ ను మొటిమలున్న ప్రదేశంలో అప్లై చేసి.. 15నిముషాల తర్వాత గోరువెచ్చని నీటితో శుభ్రం చేసుకోవాలి. దీనిని రెగ్యులర్ గా అప్లై చేయడం చేసుకుంటే.. మొటిమలు, మచ్చలు తొలగిపోతాయి.