మాన్-సూన్ స్కిన్ కేర్ బెస్ట్ టిప్స్

Posted: 08/04/2015 03:04 PM IST

వాతావరణ మార్పుల ప్రభావం చర్మసౌందర్యంపై ఎక్కువగా వుంటుంది. దాంతో చర్మం పొడిబారిపోవడంతోపాటు, మచ్చలు ఏర్పడటం, ముడతలు పడటం, ఇంకా రకరకాల సమస్యలకు గురవుతుంది. ఇలా సీజనల్ ప్రకారం వచ్చే చర్మసమస్యల నుంచి ఉపశమనం పొందడానికి కొన్ని ‘మాన్సూన్ స్కిన్-కేర్ టిప్స్’ వున్నాయి. వాటిని తరుచుగా పాటిస్తే చాలు.. అద్భుతమైన ప్రయోజనాలు పొందవచ్చు. మరి.. ఆ చిట్కాలేంటో తెలుసుకుందామా..

* టీట్రీ ఆయిల్‌ : తేయాకు నూనె, కొబ్బరి నూనెల మిశ్రమంతో తయారుచేయబడే ఈ నూనె చర్మానికి ఎంతో మేలు చేస్తుంది. ముఖ్యంగా ఈ మిశ్రమంలో వుండే తేయాకు నూనె క్రిమిసంహారినిగా వ్యవహరిస్తుంది. చిన్న చిన్న పగుళ్లు, దద్దుర్లు, మొటిమలు వంటి వాటి నుంచి ఉపశమనం కలిగిస్తుంది. ఈ రెమెడీని రెగ్యులర్ గా చర్మానికి పట్టిస్తే.. ఎంతో మంచిది.

* అలోవెరా జెల్ : ఇది చర్మానికి దివ్యౌషధంలా పనిచేస్తుంది. వర్షాకాలంలో వచ్చే చర్మ సమస్యలకు ఇదో అద్భుతమైన విరుగుడు. చర్మంలోని రక్తకణాలను కూడా శుభ్రం చేసే శక్తి దీనికి వుంది. అలాగే చర్మంపై వున్న మొటిమలు, ముడతలను నివారిస్తుంది. ఇంట్లో నుంచి బయటికి వెళ్లినప్పున ప్రతిసారీ.. ఈ జెల్‌ను రాసుకోవడం ఎంతో ఉత్తమం.

* తేనె : సహజసిద్ధమైన సౌందర్యాన్ని మెరుగుపరుచుకోవాలంటే.. ప్రకృతి సహజమైన తేనే ఎంతో శ్రేయస్కరం. ఇది పొడి చర్మానికి చక్కటి మందులా పనిచేస్తుంది. బ్రౌన్‌షుగర్‌, తేనె, ఆలివ్‌ ఆయిల్‌, నిమ్మరసం తదితరాలను ఓ పాత్రలో కలిపి.. ఆ మిశ్రమాన్ని ముఖానికి మాస్క్‌ లా వేసుకుంటే.. అద్భుతమైన ఫలితాన్ని గమనించవచ్చు.

* తాజాపండ్లు : తాజాగా వుండే మామిడి, దానిమ్మ పండ్లు చర్మం మీద మచ్చలు ఏర్పడకుండా కాపాడతాయి. జ్యూస్ లేదా నేరుగా తినడం లేదా రెమెడీల రూపంలో ఆ పండ్లను తీసుకోవచ్చు. ఇక పుచ్చకాయ రసంలోకి మిల్క్‌పౌడర్‌ను కలుపుకుని రాసుకున్నా కూడా చర్మం మీదున్న తాత్కాలిక మచ్చలు తగ్గుతాయి.

* యాంటీ ఫంగల్‌ పౌడర్‌ : వర్షాకాలంలో అతిపెద్ద సమస్య ఫంగస్‌. శుభ్రత లోపించినా.. లేకపోతే అపరిశుభ్రమైన వాతావరణంలోకి వెళ్లినా.. వెంటనే ఫంగస్‌ దాడి చేస్తుంది. వీటి బారి నుండి తప్పించుకోవాలంటే.. యాంటీ ఫంగల్‌ పౌడర్‌ను అద్దుకుంటే చాలు. చర్మసమస్యల బారిన పడకుండా సురక్షితంగా వుండొచ్చు.