అవాంఛిత రోమాలను నివారించే చిట్కాలు

Posted: 07/03/2015 12:16 PM IST

సాధారణంగా కొందరు మహిళల్లో ముఖం, చేతులు, కాళ్లపై అవాంఛిత రోమాలు పెరుగుతూ నిత్యం ఇబ్బంది కలిగిస్తుంటాయి. ఇవి చర్మసౌందర్యాన్ని అందవిహీనంగా మార్చేస్తాయి. వీటిని నివారించేందుకు త్రెడింగ్, షేవింగ్, వ్యాక్సింగ్ లాంటి కృత్రిమ పద్ధతులు అందుబాటులో వున్నాయి. కానీ.. కొందమందికి అవి పడకపోవచ్చు. కొన్ని సందర్భాల్లో వాటిని సరిగ్గా చేయకపోతే చర్మంపై దద్దర్లు, ఎర్రటి పొక్కులు రావడంతోపాటు తీవ్ర నొప్పి కలుగుతుంది. పైగా.. సైడ్ ఎఫెక్ట్స్ వచ్చే అవకాశాలూ వున్నాయి. కాబట్టి.. వాటికంటే ఇంట్లోనే కొన్ని రెమెడీలు చేసుకుని, వాటి ద్వారా సులభంగా రోమాలు తొలగించుకోవచ్చు. ఆ చిట్కాలేంటో తెలుసుకుందామా...

* శెనగపిండి-గంధం : ఒక పాత్రలో శెనగపిండి, గంధం ఒక్కోటి రెండు టేబుల్‌ స్పూన్లు చొప్పున తీసుకోవాలి. అలాగే తాజా మీగడ, ఆముదం, రోజ్‌వాటర్‌లు ఒక్కో స్పూన్‌ చొప్పున తీసుకుని కొద్దిగా పసుపు కూడా వేయాలి. ఇలా అన్నింటిని వేసిన అనంతరం బాగా కలియబెట్టాలి. ఈ మిశ్రమాన్ని అవాంఛిత రోమాలున్న ప్రాంతంలో రాయాలి. 15 నిముషాల తర్వాత అపసవ్య దిశలో మర్దనా చేయాలి. ఆ తరువాత చల్లటి నీళ్లతో కడిగేయాలి.

* మసూర్ దాల్ : కొద్దిగా ఎర్ర కందిపప్పును మిక్సీలో వేసి మీడియంలో గ్రైండ్‌ చేసుకోవాలి. అనంతరం అందులో కొద్దిగా తేనె, గంధం, ముల్తాని మట్టి వేసి బాగా కలుపుకోవాలి. ఈ మిశ్రమాన్ని చర్మం మీద రాసుకోవాలి. ఆరిన తరువాత అపసవ్య దిశలో మర్దనా చేసుకోవాలి. అనంతరం చల్లని నీళ్లతో కడిగేయాలి. ఇలా చేయడం వల్ల అవాంఛిత రోమాల పెరుగుదల వేగం చాలావరకు తగ్గుతుంది.

* పంచదార-నిమ్మరసం : పంచదార, నిమ్మరసం, తేనెల మిశ్రమాలతో అవాంఛితరోమాలు తొలగించుకోవచ్చు. పంచదారను నీటితో కలిపితే. అది మంచి ఎక్స్ ప్లోయేట్ గా పనిచేస్తుంది. నిమ్మరసం ఒక అద్భుతమైన ఆస్ట్రిజెంట్ గా పనిచేస్తుంది. అవాంఛితరోమాలను శరీరం నుండి తొలగిస్తుంది. ఈ మూడింటిని వేర్వేరుగా చర్మానికి పట్టించుకుని, కాసేపు తర్వాత శుభ్రంగా కడిగేసుకోవాలి.

* పసుపు-శెనగపిండి: ఒక పాత్ర తీసుకుని అందులో పసుపు, శెనగపిండి, వేపాకు పొడి, పచ్చి పాలు తదితరాలు వేసి బాగా కలుపుకోవాలి. ఈ మిశ్రమాన్ని ముఖానికి రాసుకుని పావుగంట వుండాలి. పూర్తిగా ఆరిపోకముందే చేతి వేళ్లను గుండ్రంగా తిప్పుతూ నెమ్మదిగా మర్దనా చేయాలి. ఇది సహజసిద్ధమైన యాంటీసెప్టిక్‌గా పనిచేసి రోమాలు పెరగకుండా నిరోధిస్తుంది.

* గుడ్డు-నిమ్మరసం : ఒక పాత్రలో గుడ్డు తెల్లసొన వేసి, అందులో కొన్ని చుక్కల నిమ్మరసం కలుపుకోవాలి. ఈ మిశ్రమాన్ని బాగా కలియబెట్టి.. ముఖానికి మాస్క్‌లా వేసుకోవాలి. బాగా ఆరిన తర్వాత ఈ మాస్క్‌ లాగేస్తే.. అవాంఛిత రోమాలు దాంతోపాటు ఊడి వచ్చేస్తాయి. ఈ మాస్క్ చర్మాన్ని బిగుతుగా, మృదువుగా ఉంచుతుంది.