అందమైన శిరోజాలకు ఇంటి చిట్కాలు

Posted: 06/20/2015 07:56 PM IST

Hair beauty tips home remedies healthy foods

అందం విషయంలో శిరోజాలు కూడా ప్రముఖపాత్ర వహిస్తాయి. కాబట్టి వాటిని అందంగానూ, ఆరోగ్యంగానూ వుంచుకోవాలి. జుట్టు అందంగా, నలుగురినీ ఆకర్షించేలా మెరవాలంటే కొన్ని ఇంటి చిట్కాలు అందుబాటులో వున్నాయి. సాధారణంగా వాడే బ్యూటీ ప్రోడక్ట్స్ కంటే ఈ చిట్కాలు మరింత మెరుగ్గా పనిచేసే శిరోజాల అందాన్ని పెంచుతాయి. ఇంతకీ ఆ ఇంటి చిట్కాలేంటో తెలుసుకుందామా..

శిరోజాల అందాన్ని మెరుగుపరిచే చిట్కాలు :

* కొంతమంది జుట్టు దట్టంగా లేదని బాధపడుతుంటారు. అటువంటి వారు ఎగ్ హెయిర్ ప్యాక్ జుట్టుకు పట్టిస్తే త్వరలో ఫలితం పొందుతారు. రెండు గుడ్లు కొట్టి, అందులో రెండు స్పూన్ల నీరు కలపాలి. జుట్టును తడిచేసి చేసిన అనంతరం తలమీద ఈ గుడ్డుసొన మిశ్రమం పట్టించాలి. బాగా అద్ది 15 నిమిషాల తర్వాత గోరు వెచ్చని నీటితో తలస్నానం చేయాలి. ఇలా వారానికోసారి లేదా నెలకు రెండుసార్లు చేయడం ద్వారా జుట్టు దట్టంగా పెరుగుతుంది.

* శిరోజ సంరక్షణకు ఆలుగడ్డ ఎంతో సహకరిస్తుంది. తాజాగా వుండే ఒక ఆలుగడ్డను తీసుకుని దాని నుంచి రసాన్ని తీయాలి. ఆ రసంలో కోడిగుడ్డు తెల్లసొనను, కొంచెం నిమ్మరసం వేసి బాగా కలియబెట్టాలి. ఈ మిశ్రమాన్ని జుట్టుకు, మాడుకు పట్టించుకోవచ్చు. ఇలా చేస్తే.. వెంట్రుకలు ఆరోగ్యవంతంగా, మెరుగ్గా అవుతాయి.

* తాజా ఉసిరికాయల గుజ్జును తలకు పట్టిస్తే ఎన్నో ఫలితాలను పొందవచ్చు. ఈ గుజ్జును జుట్టుకు పట్టించడం వల్ల శిరోజాలకు మంచి రంగు వస్తుంది. తల త్వరగా నెరవదు. జుట్టు రాలిపోవడం ఆగిపోతుంది. మొత్తంగా జుట్టు ఆరోగ్యంగా, మెరుగ్గా తయారవుతుంది. మెదడుకి చలువ చేస్తుంది.

* అరడజను అరటిపండ్లు, రెండు గుడ్లు, ఒక కప్పు బీర్ తీసుకోండి. ఈ మూడింటిని ఒక కప్పులో వేసి బాగా కలియబెట్టాలి. ఈ మిశ్రమాన్ని జుట్టుకు పట్టించాలి. అరగంట తర్వాత షాంపూతో స్నానం చేయాలి. గుడ్లలోని ప్రోటీన్, అరటిలోని తేమ కలిసి జుట్టు మృదువుగా అందంగా, దట్టంగా తయారు చేస్తాయి.