డ్యామేజ్ హెయిర్ కి ఇంటి చిట్కాలు..

Posted: 05/27/2015 05:39 PM IST

వేసవిలో ఎండతాపం వల్ల జుట్టు సమస్యలు తలెత్తుతాయి. కేశాలు పొడిబారిపోవడం, జుట్టు చివర్లో చిట్లిపోయి రాలిపోవడం, మెరుగుదనం కోల్పోవడం, ఇంకా ఇతర ఇబ్బందులు తప్పవు. ఒక్కమాటలో చెప్పాలంటే.. వేసవిలో హెయిర్ పూర్తిగా డ్యామేజ్ అయ్యే అవకాశాలు చాలా వున్నాయి. అలాంటప్పుడు జట్టును డ్యామేజ్ కాకుండా రక్షించుకోవాలంటే.. అందుకు అనుగుణంగా కొన్ని ఇంటి చిట్కాలు పాటిస్తే చాలు. జుట్టు సంబంధిత సమస్యలను త్వరగా ఉపశమనం పొందవచ్చు. మరి.. ఆ చిట్కాలేంటో తెలుసుకుందామా..

డ్యామేజ్ హెయిర్ కి చిట్కాలు :

* పెరుగు-మెంతుల హెయిర్ ప్యాక్ : ముందుగా మెంతుల్ని మిక్సీలో వేసి మెత్తని పేస్టులా రుబ్బుకోవాలి. ఈ పేస్ట్ ను పెరుగులో వేసి బాగా కలుపుకోవాలి. ఈ పేస్ట్‌ని జుట్టు మొదళ్ల నుంచి చివర్ల వరకూ, మాడుకు పట్టించి గంట పాటు అలాగే ఉండనివ్వాలి. తర్వాత షాంపుతో తలస్నానం చేసి కండీషనర్ రాసుకోవాలి. ఈ ప్యాక్ ను వారానికి మూడుసార్లు జుట్టుకు పూసుకుంటే.. జుట్టు రాలిపోయే సమస్యను అధిగమించవచ్చు. ఈ ప్యాక్‌లో ఉపయోగించిన మెంతుల వల్ల జుట్టు ఆరోగ్యంగా వుండడంతోపాటు చివర్లు చిట్లిపోవడాన్ని తగ్గిస్తుంది. అలాగే జుట్టు ఎక్కువగా రాలిపోవడాన్ని అరికడుతుంది.

* ఆలివ్ ఆయిల్ ప్యాక్‌ : ఒక పాత్ర తీసుకుని అందులో ఒకకప్పు గడ్డ పెరుగు, మూడు చెంచాలు ఆలివ్ ఆయిల్ వేసి బాగా కలుపుకోవాలి. ఈ పేస్టులో నుంచి కాస్త మిశ్రమాన్ని తీసుకుని.. దానిని మాడుపై వేసి ఓ పది నిముషాలపాటు గుండ్రంగా మసాజ్ చేసుకోవాలి. తర్వాత మిగిలిన పేస్ట్ తో జుట్టు మొత్తం కిందవరకూ ప్యాక్‌లాగా వేసుకోవాలి. అరగంట తర్వాత షాంపూతో శుభ్రంగా తలస్నానం చేస్తే మంచి ఫలితం ఉంటుంది. వారానికి రెండు సార్లు ఈ ప్యాక్ వేసుకుంటే మరింత మెరుగైన ఫలితం ఉంటుంది. తలస్నానానికి ఉపయోగించే షాంపూ తక్కువ గాఢత కలిగి ఉండేలా జాగ్రత్త పడాలి.

చివరగా : కేశాలను సంరక్షించడంలో ఆలివ్ ఆయిల్ ఎంతో తోడ్పడుతుందని బ్యూటీషన్లు అంటున్నారు. ఆలివ్ ఆయిల్‌తో జుట్టు మృదువుగా తయారవుతాయి. మాడంతా పొడిగా మారినట్లు లేదా చుండ్రు సమస్యను ఎదుర్కొంటుంటే.. ఆలివ్ ఆయిల్ ప్యాక్‌ను ట్రై చేస్తే, డాండ్రఫ్ నుంచి ఉపశమనం లభిస్తుంది.