చర్మ ముడతలను నివారించే గుమ్మడి-తేనె ఫేస్ ప్యాక్

Posted: 04/11/2015 02:52 PM IST

వాతావరణ పరిస్థితుల్లో వచ్చే మార్పుల కారణంగానూ, వయస్సు పైబడటం వల్లగానూ చర్మం ముడతలు పడుతుంటుంది. తద్వారా చర్మసౌందర్యం పూర్తిగా తగ్గిపోవడంతో కాలక్రమంలో అందవిహీనంగా కనిపిస్తారు. ఆ తర్వాత మొటిమలు, నల్లని ఛాయలు, ఇంకా ఇతరత్ర చర్మ సమస్యలు వచ్చే అవకాశం వుంది. కాబట్టి.. ముందుగా చర్మం ముడతలు పడకుండా జాగ్రత్త పడితే.. ఈ చర్మ సమస్యల నుంచి విముక్తి పొందడంతోపాటు సౌందర్యం మెరుగుపడుతుంది. అయితే.. చర్మం ముడతలు పడకుండా వుండాటానికి  బ్యూటీ ప్రోడక్ట్స్ వాడడం కంటే కొన్ని హోమ్ రెమెడీస్ ఎంతో సమర్థవంతంగా పనిచేస్తాయి. అలాంటి వాటిల్లో గుమ్మడి-తేనె ఫేస్ ప్యాక్ ని ఒకటిగా చెప్పుకోవచ్చు.

ఎందుకంటే.. ఈ ఫేస్ ప్యాక్ చర్మసౌందర్యాన్ని మెరుగుపరచడంతోపాటు ఎన్నోరకాల చర్మసమస్యల నుంచి కాపాడుతుంది. ముఖ్యంగా ఈ రెండింటిలో ఒకటైన గుమ్మడిలో ఎన్నో పోషకాలు వుంటాయి. తద్వారా దాని నుంచి ఎన్నో ప్రయోజనాలు పొందవచ్చు. అవేమిటంటే.. ఈ గుమ్మడి ముడతలను నివారిస్తుంది.. హైడ్రేషన్ అందిస్తుంది.. గుమ్మడి జ్యూస్‌లో క్యాల్షియం, ప్రోటన్స్, పొటాషియం అధికంగా ఉండటం వల్ల అవి చర్మంలోని మచ్చలను, పిగ్మెంటేషన్ లతోపాటు ఇతర సమస్యలను నివారిస్తాయి. అలాగే గుమ్మడిలో వుండే జింక్, విటమిన్ సి వంటి పోషకాలు కాలిన గాయాలను మాన్పడంలో సమర్థవంతంగా పనిచేస్తాయి. అంతేకాదు.. ఏవైనా కీటకాలు కుట్టినప్పుడు కలిగే మంటను నివారించడంలో గుమ్మడి జ్యూస్ ఎంతో సహకరిస్తుంది. చర్మ ఇన్ఫెక్షన్‌ను తగ్గిస్తుంది. ఇన్ని పోషకాలు కలిగిన గుమ్మడిలో కాస్త తేనె కలుపుకుంటే.. మరిన్ని బెనిఫిట్స్ పొందవచ్చు.

గుమ్మడి - తేనె ఫేస్ ప్యాక్ :

1. ఒక చిన్న పాత్ర తీసుకుని అందులో కొద్దిగా గుమ్మడి జ్యూస్ తీసుకోవాలి. అనంతరం అందులో కొద్దికొద్దిగా తేనె, పెరుగు, నిమ్మరసం తదితర పదార్థాలను మిక్స్ చేసి.. చిక్కటి పేస్ట్‌గా తయారుచేసుకోవాలి. ఈ పేస్ట్‌ను ముఖానికి ప్యాక్‌లా వేసుకోవాలి. కాసేపు తర్వాత గోరువెచ్చని నీటితో శుభ్రం చేసుకోవాలి. ఇలా వారానికి రెండుసార్లు చేసుకుంటే.. ముడతల సమస్య నుంచి ఉపశమనం పొందవచ్చు. ఫలితంగా చర్మం మృదువుగా, సౌందర్యవంతంగా మారుతుంది. ఇంకో విషయం ఏమిటంటే.. ఈ ఫేస్ ప్యాక్ స్కిన్ మాయిశ్చరైజ్ గా కూడా పని చేస్తుంది.
 
2. ఒక పాత్ర తీసుకుని అందులో కొద్దిగా గుమ్మడి జ్యూస్, కొద్దిగా తేనె వేసి బాగా కలియబెట్టాలి. ఈ మిశ్రమాన్ని ముఖానికి అప్లై చేసుకోవాలి. ఆరిన తర్వాత శుభ్రంగా కడిగేసుకోవాలి. ఇలా చేయడం వల్ల చర్మం తేలికగా మారి, మచ్చలు లేకుండా పోతాయి. అలాగే చర్మం ప్రకాశవంతంగా తయారవుతుంది.