జుట్టు సంరక్షణకు హెయిర్ మాస్క్

Posted: 12/03/2014 05:31 PM IST

జుట్టు సంరక్షణ కోసం ప్రత్యేకంగా బ్యూటీపార్లర్లకు వెళ్లి అనవసరంగా డబ్బులు ఖర్చు చేసుకోవడం కంటే.. ఇంట్లోనే కొన్ని ప్యాక్స్ తయారుచేసుకుని రెగ్యులర్ వాటిని అప్లై చేసుకుంటే మంచి ఫలితాన్ని పొందవచ్చు. మారుతున్న వాతావరణ పరిస్థితుల నేపథ్యంలో జుట్టు సమస్యలు వస్తుంటాయి. జుట్టు రాలిపోవడం, లేదా చిట్లిపోవడం, లేదా తెల్లగా మారడం లాంటి సమస్యలు ఏర్పడుతాయి. అటువంటి వాటి నుంచి త్వరగా ఉపశమనం పొందాలంటే కొన్ని హోంమేడ్ మాస్క్’లు అందుబాటులో వున్నాయి. వాటిని ఎలా తయారుచేస్తారో.. వాటివల్ల కలిగే ఉపయోగమేమిటో తెలుసుకుందాం...

1. అరటిపండు-తేనె-నిమ్మరసం (బనానా హెయిర్ ప్యాక్) : పొడిబారిన లేదా చిట్లిన జుట్టు కోసం ఈ హెయిర్ ప్యాక్ బాగా పనిచేస్తుంది. అరటిపండును ఒక గిన్నెలో గుజ్జుగా చేసుకుని అందులో కొద్దిగా తేనె, నిమ్మరసం బాగా కలుపుకోవాలి. ఆ మిశ్రమాన్ని తలలోని చర్మానికి, మొదళ్ళకు పట్టే విధంగా అప్లై చేయాలి. అరగంటవరకు అలాగే వదిలేసి తర్వాత మంచి షాంపూతో తలస్నానం చేయాలి. ఇలా చేస్తే.. తల వెంట్రుకలు సున్నితంగా, మంచి షైనింగ్’తో మొరుస్తాయి.

2. గుడ్డు-తేనె-నిమ్మరసం (ఎగ్ హెయిర్ ప్యాక్) : రెండు గుడ్లను పగులగొట్టి అందలోని పచ్చ సొన, ఒక ఎగ్ వైట్ కలిపి బాగా మిక్స్ చేయాలి. అందులో కొద్దిగా తేనె, నిమ్మరసం కలిపి బాగా మిక్స్ చేయాలి. ఈ మిశ్రమాన్ని తలకు పట్టించి అరగంట తర్వాత గోరువెచ్చని నీటితో శుభ్రం చేసుకోవాలి. అలాగే మరో గిన్నెలో ఒక కప్పు పెరుగు తీసుకొని తలకు పట్టించి పదిహేను నిముషాల తర్వాత శుభ్రం చేసుకోవాలి. ఈ విధమైన ప్యాక్స్ డ్యామేజ్ అయిన హెయిర్ కోసం ఉపయోగించాల్సి వుంటుంది.

3. మెంతులు : ఒక కప్పు మెంతులను రాత్రంతా నీటిలో నానబెట్టి, ఉదయం నీటితో సహా మెత్తగా పేస్ట్ లా గ్రైండ్ చేసుకోవాలి. ఈ పేస్ట్’ను జుట్టుకు పట్టించాలి. ఇది బాగా తడి ఆరిన తర్వాత మంచి షాంపూతో తలస్నానం చేసుకోవాలి. జుట్టు పోషణకు మెంతి చాలా అద్భుతంగా పనిచేస్తుంది. స్టాటిక్ హెయిర్ కోసం ఈ పేస్ట్ బాగా పనిచేస్తుంది.

4. వెనిగర్-తేనె: ఒక కప్పులో గోరువెచ్చని నీటిని తీసుకొని అందులో వెనిగర్, తెనె రెండూ సమపాళ్ళలో మిక్స్ చేయాలి. ఈ మిశ్రమాన్ని తలకు పట్టించుకోవాలి. ఇలా చేయడం వల్ల కురులకు అధిక శక్తిని వస్తుంది. అయితే ఈ హెయిర్ ప్యాక్ ను వెంటవెంటనే ఉపయోగించకూడదు. వెనిగర్ ఎక్కువ సేపు తలలో ఇంకడం వల్ల కురులకు చెడు ప్రభావం కలిగిస్తుంది. నిర్జీవమైన కురుల కోసం ఈ ప్యాక్ అద్భుతంగా పనిచేస్తుంది.

5. ఎగ్-తేనె-క్యాస్ట్రో ఆయిల్ : ఒక బౌల్లో గుడ్డులోని పచ్చసొనతోబాటు రెండు చెంచాలా తేనె, రెండు చెంచాలా క్యాస్ట్రో ఆయిల్ వేసి బాగా మిక్స్ చేయాలి. ఈ మిశ్రమాన్ని తలకు పట్టించి ఒక గంట తర్వాత గోరువెచ్చని నీటితో తలస్నానం చేయాలి. ఈ మిశ్రమాన్ని రెగ్యులర్ గా తలకు పట్టించడం వల్ల హెయిర్ బ్రేకేజ్ కాకుండా అరికడుతుంది.