చాకొలేట్ తో మెరిసే సౌందర్యం.. మీ సొంతం!

Posted: 09/15/2014 03:32 PM IST

సాధారణంగా చాకొలేట్ అంటే చిన్నపిల్లల నుంచి పెద్దలవరకు తినడానికి ఇష్టపడతారు. అయితే ఆ చాకొలేట్ నుంచి మెరిసే సౌందర్యాన్ని సొంతం చేసుకోవచ్చునని నిపుణులు తమ పరిశోధనల ద్వారా వెల్లడిస్తున్నారు. ఇంటర్నేషనల్ చాకొలేట్ డే సందర్భంగా శాస్త్రజ్ఞులు నిర్వహించిన కొన్ని పరిశోధనల ఆధారంగా చాకొలేట్ థెరపీని ఆవిష్కరించారు. ఈ చాకొలేట్ థెరపీని ప్రతిరోజూ పాటిస్తే.. కొత్త ఉత్సాహాన్ని, ఉత్తేజాన్ని పొందవచ్చని వారు పేర్కొంటున్నారు. చర్మానికి చక్కటి మెరుపులను ఇవ్వడంతోపాటు నిరాశ నిస్పృహలను కూడా దూరం చేస్తుంది. అంటే... ఇది కేవలం అందాన్నే కాదు.. ఆరోగ్యాన్ని కూడా ప్రసాదిస్తుందని నిపుణుల సలహా!

చాకొలేట్ థెరపీతో అందాన్ని పొందే విధానాలు :

మొదటి విధానం : 50 గ్రాముల చాకొలేట్ ను తీసుకుని దానిని వేడినీటిలో రంగరించుకోవాలి. అది పలుచగా వున్నప్పుడే ముఖానికి మాస్క్ లాగా పట్టించుకోవాలి. బాగా ఆరిన తర్వాత వేడినీటితో శుభ్రం చేసుకుని.. పొడిగా వుండే బట్టతో తుడుచుకోవాలి.

రెండవ విధానం : మొదట 50 గ్రాముల చాకొలేట్ తీసుకుని దానిని వేడినీటిలో బాగా కలుపుకోవాలి. అనంతరం అందులో ఓ స్పూన్ ఆలివ్ ఆయిల, కోడిగుడ్డు సొన కలిసి.. బాగా మిక్స్ చేయాలి. ఆ మిశ్రమాన్ని ముఖానికి పట్టించి, 15 నిముషాల వరకు అలాగే వుంచుకోవాలి. తర్వాత వేడినీటితో ముఖాన్ని శుభ్రం చేసుకోవాలి.

మూడవ విధానం : 50 గ్రాముల చాకొలేట్ తీసుకుని అందులో కోక్ పౌడర్, 2 చెంచాల ఉప్పు కలుపుకోవాలి. ఈ మిశ్రమాన్ని వేడినీటిలో కలుపుకోవాలి. కొద్దిసేపటివరకు వుంచుకున్న తర్వాత వేడినీటితో శుభ్రం చేసుకోవాలి. ఇలా చేస్తే డెడ్ సెల్స్ తొలగిపోయి.. మెరుగైన చర్మసౌందర్యం వస్తుంది.

ఇలా ఈ విధంగా రకరకాల పద్ధతుల్లో వీలున్నప్పుడల్లా ముఖానికి స్ర్కబ్ చేసుకుంటే.. మెరుగైన చర్మసౌందర్యాన్ని సొంతం చేసుకోవచ్చు. అలాగే ముఖంపై వున్న మొటిమలు, కళ్లకింద వుండే నల్లటి ఛారలు, మచ్చలు పూర్తిగా తొలగిపోతాయి. రాత్రి నిద్రపోవడానికి ఒక గంట ముందు ఇలా చేసుకుంటే ఫలితాన్ని తొందరగా పొందుతారు.