పరమశివుని కృపతో ఏర్పడిన ‘బిందు సరోవరం’ విశేషాలు

Posted: 04/11/2015 07:17 PM IST

గుజరాత్‌లోని పఠాన్‌జిల్లా, సిద్ధపూర్‌లో అహ్మదాబాద్‌ - డిల్లీ జాతీయ రహదారిలో ‘బిందు సరోవరం’ ఉంది. ఈ సరోవరం పరమశివుని కృపతో ఏర్పడిందని, కపిలముని తపస్సు చేసి తరించిన ప్రాంతమని చెబుతారు.

పురాణ గాథ :

మొదటి కథ : పూర్వం.. స్వాయంభువు మనువు-శతరూప దంపతులకు ఆకూతి, ప్రకూతి, దేవహూతి అనే ముగ్గురు కుమార్తెలు వుండేవారు. వీరి ముగ్గురిలో దేవహుతికి వివాహం చేయడం కోసం ఆమెకు తగిన వరుడిని వెతికే ప్రయత్నంలో స్వాయంభువు దేశదేశాలకు తిరిగాడు. ఇలా తిరిగితిరిగి చివరకు అతను ఈ ప్రాంతానికి (సిద్ధపూర్) రాగానే అక్కడ కర్దముడు అనే ఓ యువకుడు అతని కంటబడ్డాడు. అతడే తన కూతురికి తగిన వరుడని సంతోషిస్తున్న సమయంలో అతని కళ్ళ నుండి ఆనందభాష్పాలు వెలువడ్డాయట. ఆ భాష్పాల వెల్లువతోనే ఈ ‘బిందు సరోవరం’ ఏర్పడిందని కథనం.

ఇక కర్దమ - దేవహూతిల వివాహం అయిన తరువాత సంతానప్రాప్తి కోసం కర్దమముని ఓ విమానాన్ని సృష్టించాడు. దాని ద్వారా లోకమంతా తీర్థయాత్రలు చేస్తూ పుణ్యస్నానాలు చేయసాగారు. అలా వారు సరస్వతీ నదిలో పుణ్యస్నానం చేయగా వారికి తొమ్మిదిమంది కుమార్తెలు కలిగారు. కూతుళ్లందరికీ పెళ్లుళ్ళు చేసిన కర్దముని మనసులో తనకు ఓ కొడుకు కూడ వుంటే బాగుంటుందనిపించింది. అప్పుడు అతడు తన భార్యను పిలిచి శ్రీమన్నారాయణుని పూజచేయమన్నాడు. అలా దేవహుతి ప్రార్థనలతో ప్రసన్నుడైన విష్ణుదేవుడు ఆమెకు పుత్రభాగ్యాన్ని కలిగించాడు. ఆ పుత్రుడే కపిలుడు.

ఇతర విశేషాలు :

ఈ బిందు సరోవరం ప్రక్కన కపిలముని, కర్దమ - దేవహూతిల సన్నిధులున్నాయి. ఈ బిందు సరోవరం ప్రక్కనున్న రావిచెట్టు క్రింద తర్పణాలు చేస్తుంటారు. ఇక్కడ మాతృదేవతలకు మాత్రమే తర్పణాలను చేయడం విశేషం. ఇలా మాతృదేవతలకు మాత్రం తర్పణాలు ఇవ్వడాన్ని దేశంలో మరెక్కడా చూడలేము.