ప్రాణాంతక ఎబోలా వ్యాధి వ్యాక్సిన్ వచ్చేసిందోచ్..!

Posted: 11/28/2014 04:37 PM IST

ఎబోలా వైరస్‌ను నివారించటానికి ప్రయోగాత్మకంగా రూపొందించిన 'ఎన్ఏఐడీ/జీఎస్‌కే ఎబోలా టీకా' సురక్షితంగా పనిచేస్తున్నట్టు తేలింది. మనుషులపై ప్రయోగ పరీక్షల్లో భాగంగా దీన్ని 20 మంది సంపూర్ణ ఆరోగ్యవంతులకు ఇవ్వగా.. టీకాను బాగా తట్టుకున్నట్టు, అందరిలోనూ రోగనిరోధక వ్యవస్థ ప్రతిస్పందనలు ఉత్పత్తి అయినట్టు వెల్లడైంది. ఎవరిలోనూ సైడ్ ఎఫెక్ట్స్ కనబడలేదని అయితే 20 మందిలో ఇద్దరు మాత్రం జ్వరంతో బాధపడ్డారని పరిశోధకులు తెలిపారు. నేషనల్ ఇన్‌స్టిట్యూట్స్ ఆఫ్ హెల్త్‌కు చెందిన ఎన్ఐఏఐడీ టీకా పరిశోధన కేంద్రం, గ్లాక్సోస్మిత్‌క్త్లెన్ పరిశోధకులు సమష్టిగా.. రెండు ఎబోలా వైరస్ జాతుల నుంచి సేకరించిన వైరస్ జన్యు పదార్థ భాగాలతో ఈ టీకాను రూపొందించారు.

తాజా ఫలితాల ఆధారంగా.. టీకా సామర్థ్యాన్ని నిర్ధరించేందుకు పెద్ద ఎత్తున ప్రయోగాలు చేయాలని భావిస్తున్నామని ఎన్ఐఏఐడీ సంచాలకుడు ఆంటోనీ ఎస్.ఫాసి తెలిపారు. మేరీల్యాండ్‌లోని నేషనల్ ఇన్‌స్టిట్యూట్స్ ఆఫ్ హెల్త్‌లో 18-50ఏళ్ల వారిపై ఎబోలా టీకా ప్రయోగ పరీక్షను నిర్వహించారు. నాలుగు వారాల్లో వీరిలో యాంటీ-ఎబోలా యాంటీబోడీలు పుట్టుకొచ్చినట్టు తేలింది. దీంతో మరికోన్ని పర్యాయాల ప్రయోగం తరువాత వ్యాక్సిన్ ను విడుదల చేయనున్నారు.
 
జి.మనోహర్