రాజధాని కోసం బలవంతంగా భూములు తీసుకోం..

Posted: 11/23/2014 06:22 PM IST

ఆంధ్రప్రదేశ్‌ రాజధాని నిర్మాణం కోసం రైతుల నుంచి బలవంతంగా భూములు తీసుకోబోమని ఆంధ్రప్రదేశ్‌ డిప్యూటీ సీఎం కేఈ కృష్ణమూర్తి స్పష్టం చేశారు. ఆయన మీడియాతో మాట్లాడుతూ భూసమీకరణకు రైతులు ఇష్టపడితేనే భూములు తీసుకుంటామని తెలిపారు. పెట్టుబడులు, సహకారం కోసమే ఏపీ ముఖ్యమంత్రి విదేశీ పర్యటనలు చేస్తున్నారని ఆయన చెప్పారు. రుణ మాఫీ విషయమై వెనక్కి వెళ్లే ప్రసక్తే లేదని, అమలు చేసి తీరుతామని ఆయన అన్నారు.
 
రైతులు లక్ష రూపాయలకైనా అమ్ముకోగలిగితే రెండు, మూడేళ్ల తర్వాత వారికి ప్రభుత్వం అన్ని రకాల సౌకర్యాలు కల్పిస్తుందని కేఈ తెలిపారు. విద్యుత్‌, రోడ్లు, డ్రైనేజి, అన్ని విషయాల్లో కూడా అక్కడ అభివృద్ధి చేసి అదే ఎకరాను కోటి రూపాయలకు అమ్ముకునే విధంగా రైతులకు అవకాశం ఇస్తున్నామని కేఈ స్పష్టం చేశారు. ల్యాండ్‌ పూలింగ్‌కు వారు ఇష్టపడితేనే మేం తీసుకుంటున్నామని ఆయన చెప్పారు. బలవంతంగా తీసుకునే ప్రసక్తేలేదని ఆయన స్పష్టం చేశారు. రైతులను ఇబ్బంది పెట్టే సమస్యే లేదని కృష్ణమూర్తి వెల్లడించారు.

జి. మనోహర్