లీటర్ పై రూ. 2.50 మేర.. మళ్లీ తగ్గనున్న పెట్రోల్ ధర..

Posted: 10/31/2014 12:44 PM IST

Diesel petrol prices likely to be cut by rs 2 50 litre ahead of jk jarkhand assembly elections

యూపీఏ రెండో పర్యాయం అధికారంలో వచ్చినప్పటి నుంచి పెరగడమే తప్ప తరగడం తెలియక పైపైకి ఎగబాకిన చమురు ధరలు గత మూడు నెలలుగా మెల్లిగా కిందకు దిగివస్తున్నాయి. దీంతో మరోమారు పెట్రోల్ ధర తగ్గే అవకాశం కనిపిస్తోంది. ఈ ఏడాది జూన్‌లో అంతర్జాతీయ విపణిలో బ్యారెల్‌ 115 డాలర్లు పలికిన బ్రెంట్‌ క్రూడాయిల్‌ ధర.. ప్రస్తుతం 87 డాలర్లకు చేరుకుంది. ఈ నేపథ్యంలో చమురు ధరలను రూ.2 నుంచి రూ.2.50 దాకా తగ్గించేందుకు ప్రభుత్వ రంగ చమురు సంస్థలు యోచిస్తున్నట్టు సమాచారం. ఈమేరకు అవి కేంద్ర పెట్రోలియం శాఖ ఆధ్వర్యంలో శనివారం సమావేశం కానున్న ప్రభుత్వ రంగ చమురు సంస్థలు, ఎంత మేరకు ధరలు తగ్గించాలో నిర్ణయించనున్నట్టు తెలుస్తోంది. అదే జరిగితే మూడు నెలల వ్యవధిలో (ఆగస్టు నుంచి) ఆరుసార్లు పెట్రోలు ధరలు తగ్గినట్టవుతుంది.

అలాగే.. డీజిల్‌ ధరలపై నియంత్రణ ఎత్తివేసి మార్కెట్‌ రేటుకు విక్రయించాలని కేబినెట్‌ నిర్ణయం తీసుకున్న తర్వాత డీజిల్‌ ధరలు తగ్గడం ఇదే మొదటిసారి అవుతుంది. సరిగ్గా చెప్పాలంటే.. 2009 జనవరి 29న చివరిసారిగా డీజిల్‌ ధర రూ.2 మేర తగ్గింది. అప్పట్లో డీజిల్‌ ధర రూ.30.86. అప్పట్నుంచీ ధరలు పెరుగుతూ వచ్చాయే తప్ప తగ్గలేదు. పెట్రోలు ధర మాత్రం గత మూడు నెలల్లో 5 సార్లకు కలిపి రూ.6.95 పైసల మేర తగ్గింది. ఈ తగ్గింపుతో పెట్రోలు ధరలు మళ్లీ 16 నెలల కనిష్ఠానికి, డీజిల్‌ ధర మళ్లీ ఏడాది క్రితం ఎంత కనిష్టానికి చేరుకోనుందని సమాచారం. రెండు వారాల వ్యవధిలో డీజిల్‌ ధర ఇలా 11 శాతం మేర తగ్గడం వల్ల ద్రవ్యోల్బణం కూడా ఒకింత తగ్గుతుంది. కాగా... జార్ఖండ్‌, జమ్ముకశ్మీర్‌ అసెంబ్లీ ఎన్నికల నేపథ్యంలో ఈ నిర్ణయం ఊహించిందేనని మార్కెట్‌ నిపుణులు వ్యాఖ్యానిస్తున్నారు. ఎన్నికలలో లబ్ది పోందేందుక ఎన్డీఏ సర్కార్ చేస్తున్న జిమ్మిక్కుగా పలు పార్టీలు విమర్శలు గుప్పిస్తున్నాయి.

జి.మనోహర్