శ్రీశైలం జలాలపై కేసీఆర్ తో చర్చలకు సిద్దం..

Posted: 10/25/2014 01:51 PM IST

Will hold talks with kcr on power and water crisis in srisailam project

శ్రీశైలం జలాశయంలో నీటి వినియోగంపై తెలంగాణ రాష్ట్ర ముఖ్యమంత్రి కేసీఆర్‌తో చర్చించేందుకు ఏపీ ప్రభుత్వం సిద్ధంగా ఉందని ఆ రాష్ట్ర హోంశాఖ మంత్రి చినరాజప్ప తెలిపారు. కడప జిల్లా ప్రొద్దుటూరులో ఆయన మీడియాతో మాట్లాడుతూ... కేసీఆర్ నిర్వాకంతో తెలంగాణలో విద్యుత్ కష్టాలొచ్చాయని వెల్లడించారు. ఏపీ సీఎం చంద్రబాబు నాయుడు విద్యుత్ ఉత్పత్తి, సరఫరాపై దృష్టి పెట్టడంతో సమస్యను అధిగమించామని పేర్కొన్నారు. కేసీఆర్ శ్రీశైలం నీటిపై రాజకీయం చేస్తున్నారని, ఇది సరైన విధానం కాదన్నారు.

రైతులకు సాగు నీటి కోసం 854 అడుగుల నీటిని నిల్వ వుంచాలని కోరుతుంటే.. దానిని పెడచెవిన పెట్టి.. చంద్రబాబు హయాంలో 790 అడుగుల స్థాయిలో నీరు నిల్వ వుండేంత వరకు విద్యుత్ ఉత్పాదన చేశారని చెప్పడం అవివేకానికి నిదర్శనమన్నారు. గతంలో ఒక్క యూనిట్ లో విద్యుత్ ఉత్పాదన చేసిన తెలంగాణ.. రెండు రాష్టాల మధ్య వివాదం రాజుకోవడాన్ని అసరాగా చేసుకుని మూడు యూనిట్ల ద్వారా విద్యుత్ ఉత్పాదన చేస్తున్నారని.. ఇది ప్రజలకు మంచి సంకేతాన్ని ఇవ్వదని అన్నారు. ఎర్రచందనం సంరక్షణకు గట్టి చర్యలు తీసుకుంటున్నామని వివరించారు.

జి.మనోహర్