29న ‘‘కారు’’ ఎక్కనున్న టీడీపీ ఎమ్మెల్యేలు!

Posted: 10/24/2014 07:41 PM IST

Talasani srinivas yadav and teegala krishna reddy to join trs party on 29 october

తెలంగాణ రాష్ట్రంలో టీఆర్ఎస్ పార్టీ ప్రభావం ఎంతమేర వుందో అందరికీ తెలిసిందే! కేవలం కొన్ని చోట్ల మినహా రాష్ట్రం మొత్తం భారీ మెజార్టీతో గెలిచిన టీఆర్ఎస్ పార్టీ.. ఎక్కడైతే బలహీనంగా వుందో అక్కడ కూడా బలపరుచుకునేందుకు అప్పుడే ప్రణాళికలను సిద్ధం చేసుకుంది. పైగా కాలక్రమంలో ప్రజాదరణ కూడా బాగా పొందడంతో ఆ పార్టీ మెల్లమెల్లగా రాష్ట్రంలో బలపడుతూ వస్తోంది. ఈ నేపథ్యంలోనే తెలంగాణ రాష్ట్రంలో ఎమ్మెల్యేలుగా గెలిచిన ప్రత్యర్థ పార్టీ నాయకులు టీఆర్ఎస్ వైపు మొగ్గు చూపుతున్నారు. ఇప్పటికే చాలామంది నాయకులు టీఆర్ఎస్ లోకి చేరిపోగా... మరికొంతమంది కారెక్కేందుకు సిద్ధపడుతున్నారు.

ఇదిలావుండగా.. తెలంగాణ రాష్ట్రంలో తమకంటూ ఒక గుర్తింపు తెచ్చుకున్న టీడీపీ పార్టీ ఎమ్మెల్యేలు తలసాని శ్రీనివాస్ యాదవ్, తీగల కృష్ణారెడ్డిలు ఇదివరకే టీఆర్ఎస్ లోకి చేరనున్నట్టు అందరికీ తెలిసిందే! ఈ సందర్భంలోనే వారు ఈనెల 29వ తేదీన టీఆర్ఎస్ లోకి అధికారికంగా చేరనున్నారు. ఇందుకు సంబంధించి చర్చలన్నీ పూర్తయ్యాయి కూడా! 29న మీర్ పేటలోని టీఆర్ఆర్ కళాశాలలో నిర్వహించే బహిరంగ సభలో వీరిద్దరూ టీఆర్ఎస్ పార్టీ కండువా కప్పుకోనున్నారు. వీరిద్దరూ చేరికతో తెలంగాణలో టీడీపీ పార్టీకి పెద్ద దెబ్బ తగలనుంది.