లెక్చరర్ ఇంట్లో రెండో రోజూ పోలిసుల తనిఖీలు

Posted: 10/23/2014 10:46 AM IST

Police search in cr reddy college lecturer gousemohiddin house

సీఆర్ రెడ్డి కాలేజి పోలిటికల్ సైన్స్ లెక్చరర్ గౌస్మొహిద్దీన్ ఇంట్లో వరుసగా రెండవరోజు పోలిసుల తనిఖీలు జరిగాయి. బుధవారం రాత్రి ఆకస్మికంగా సెర్చ్ వారెంట్తో వచ్చిన ఏలూరు పోలిసులు ఇంట్లో విస్తృతంగా తనిఖీలు చేశారు. పలు కీలక పత్రాలు, నిరుద్యోగుల ఫొటోలు ఇతర ఆధారాలను సేకరించారు. వీటితో పాటు రియల్ ఎస్టేట్ వ్యాపారానికి సంబంధించి పలు కీలక డాక్యుమెంట్లు స్వాధీనం చేసుకున్నారు. గురువారం ఉదయం కూడా పోలిసుల తనిఖీలు కొనసాగాయి.

పోలిసుల వివరాల ప్రకారం, ఎస్సై ఉద్యోగం ఇప్పిస్తానంటూ ప్రకాశం జిల్లా ఒంగోలుకు చెందిన ఓ నిరుద్యోగి నుంచి గౌస్మొహిద్దీన్ రూ. 15 లక్షలు తీసుకున్నాడు. ఉద్యోగం రాకపోవటంతో డబ్బులు తిరిగి ఇవ్వాలని నిరుద్యోగి గౌస్పై ఒత్తిడి తెచ్చాడు. రూ. 3 లక్షలు ఇచ్చి మిగతా డబ్బు ఇవ్వకుండా తప్పించుకు తిరుగుతున్నాడు. దీంతో నిరుద్యోగి పోలీసులను ఆశ్రయించాడు. సీనియర్ ఐపీఎస్ అధికారులతో సన్నిహిత సంబంధాలు ఉన్నట్లు సమాచారం. గతంలో ఎస్ఐ, సీఐ బదిలీలు, ప్రమోషన్లలో కీలక పాత్ర షోషించినట్లు ఆరోపణలు ఉన్నాయి. అటు ఒంగోలు పరిసర ప్రాంతాల్లో రాజధాని ఏర్పాటవుతుందంటూ గౌస్ పలు రియల్ ఎస్టేట్ మోసాలకు కూడా పాల్పడినట్లు ఆరోపణలున్నాయి. దీంతో రంగంలోకి దిగిన పోలిసులు తనిఖీలు చేశారు.

కార్తిక్