దీవాళి థమాక.. టిక్కెట్ ధరలను మళ్లీ తగ్గించిన సంస్థలు..

Posted: 10/22/2014 10:45 AM IST

దీపావళి పండగ సమయాన స్పైస్‌జెట్, జెట్ ఎయిర్‌వేస్, ఇండిగో విమానయాన సంస్థలు మరోసారి చౌక ధరల యుద్ధానికి దిగాయి. దీపావళి సేల్స్ ను తాము సొంతం చేసుకుందామని యోచించిన విమానయాన సంస్థలు విమానచార్జీలను తగ్గిస్తూ పోటీకి దిగాయి. స్పైస్‌జెట్, జెట్ ఎయిర్‌వేస్ సంస్థలు రూ.899 ప్రారంభ ధరతో దేశీయ విమాన మార్గాల్లో ఎక్కడికైనా ప్రయాణించే అవకాశాన్ని కల్పిస్తున్నట్లు రెండు సంస్థలు విడివిడిగా ప్రకటించాయి. కాగా ఇండిగో మాత్రం పండగ సందర్భంగా టిక్కెట్లు కొనుగోలు చేసే ప్రయాణికులకు డిస్కంట్ ధరలను అందుబాటులోకి తీసుకువచ్చింది. ఈ నెల 26వ తేదీలోపు టిక్కెట్లు బుక్ చేసుకన్న వారు మాత్రమే ఈ అవకాశాన్ని అందుకోనున్నారు. ఈ టిక్కెట్లు బుక్ చేసుకున్నవారు నవంబరు 1 నుంచి డిసెంబరు 15 మధ్య ప్రయాణానికి మాత్రమే అర్హులని కూడా కంపెనీలు ప్రకటించాయి. ఒకవైపు ప్రయాణానికి మాత్రమే ఈ ఛార్జీల తగ్గింపు ధరలు వర్తించనున్నాయి.

స్పైస్‌జెట్ బుకింగ్‌లు మంగళవారం నుండి ప్రారంభం కాగా.. జెట్ టికెట్ బుకింగ్‌లు బుధవారం నుంచి మొదలయ్యాయి. స్పైస్‌జెట్ విషయానికొస్తే.. బెంగళూరు- చెన్నై- కోచి మార్గంలో ప్రయాణానికి ప్రారంభ చార్జీ రూ.899 కాగా, బెంగళూరు- గోవాకు రూ.1,599 నుంచి టికెట్ ధర మొదలవుతుందని ఆ కంపెనీ అధికార ప్రతినిధి తెలిపారు. ఇవి కాకుండా దేశంలో ఇతర గమ్యస్థానాలకు ప్రయాణించాలంటే రూ.2,499 నుంచి చార్జీలు ప్రారంభమవుతాయని ఆయన తెలిపారు. ఇండిగో టిక్కెట్ ధరలో 50 శాతం డిస్కౌంట్ ను ప్రకటించింది.

జి.మనోహర్