ప్రజలు కోరుకోవడం లేదా..? లేక మీరు ఇవ్వడం లేదా..?

Posted: 10/21/2014 08:42 AM IST

ఆ రెండు చానళ్లను ప్రజలు కోరుకోవడం లేదా..? వాటిని ఎందుకు కోరుకోవడం లేదు, మిగతా చానళ్లను ఎలా కోరుకుంటున్నారన్న ప్రశ్న ఉత్పన్నమైంది. తెలంగాణలో ప్రజలు ఏ ఏ చానళ్లను కోరుకుంటున్నారు.? వాటినే ఎంఎస్ఓలు ప్రసారం చేస్తున్నారా..? కోరుకోని చానళ్లను ప్రసారం చేయడం లేదా అని సందేహాలు రేకెత్తుతున్నాయి. టీవీ9, ఏబీఎన్ ప్రసారాలను ప్రజలు ప్రసారం చేయాలని కోరుకోవడం లేదని,  వారు కోరుకుంటే ప్రసారం చేస్తామని తెలంగాణ ఎంఎస్‌ఓల సంఘం రాష్ట్ర అధ్యక్షుడు సుభాష్‌రెడ్డి తెలిపారు. ఆ రెండు చానళ్ల ప్రసారాలను నిలిపివేయడంలో ప్రభుత్వ పాత్ర, ఎంఎస్‌ఓల పాత్ర ఏమీ లేదని ఆయన నల్గోండలో జరిగిన ఎంఎస్ఓ సంఘం సమావేశంలో అన్నారు.

అంతేకాదు వ్యాపార ఒప్పందాలు కొనసాగించే ఆలోచన ఆ రెండు యాజమాన్యాలకు లేదని చెప్పారు. ఉన్నత న్యాయస్థానాలు సైతం ఎంఎస్‌ఓలకు అనుకూలంగానే తీర్పు చెప్పాయని గుర్తు చేశారు. అయితే ఇక్కడే అసలు ప్రశ్న ఉత్పన్నమవుతోంది. ఎంఎస్ఓలు ఏ ఏ ఛానళ్లను ప్రసారం చేయాలి, అసలు మొత్తానికి ఎన్ని చానళ్లను ప్రసారం చేయాలి, శాటిలైట్ చానళ్లను కాకుండా చిన్న తరహా కేబుల్ చానళ్లు వారు ప్రసారం చేయవచ్చా..? వీరికి ఆ తరహా అనుమతులు వున్నాయి..? అయితే వారు చానల్ యాజమాన్యాల నుంచి ఎంత డబ్బును తీసుకోవాలి..? అన్ని శేష ప్రశ్నలే. అందరూ శాఖహారులే.. అన్నట్లు వ్యవహరిస్తున్నారు సరే.. మరి చేప కూర ఏమైందో మీరే చెప్పాలి.

జి.మనోహర్