మరాఠీగడ్డపై తెలుగోడి జయకేతనం!

Posted: 10/20/2014 08:31 PM IST

ఈసారి మహారాష్ట్రలో జరిగిన అసెంబ్లీ ఎన్నికల్లో ఎన్నో మార్పులు చోటుచేసుకున్నాయి. ఎన్నికలముందే దశాబ్దాల నుంచి కొనసాగుతూ వచ్చిన తమ స్నేహబంధాన్ని పార్టీలు తెంచుకోవడం అందరినీ ఆశ్చర్యానికి గురిచేయగా.. ఎలక్షన్ల తరువాత వస్తున్న ఫలితాలు అంతుపట్టకుండా వున్నాయి. ఒకవైపు బీజేపీ మహారాష్ట్రలో అతిపెద్ద పార్టీగా అవతరించబోతుండగా.. సీఎంగా పదవీబాధ్యతలు చేపడుదామని భావించిన ఉద్ధవ్ ఠాక్రే ఆశలు నీరుగారిపోయాయి. ఇక కాంగ్రెస్ పరిస్థితి ఐతే మరీ ఘోరంగా వుంది. అయితే ప్రభుత్వాన్ని ఏర్పాటు చేసే విషయంలో ఇంకా గందరగోళ పరిస్థితియే నెలకొని వుంది. బీజేపీ ఏ పార్టీతోనైనా పొత్తుపెట్టుకుంటే అధికారం చేతికి దక్కదు.. కానీ ఏ పార్టీలు బీజేపీతో చేతులు కలపడానికి సుముఖుత చూపడం లేదు. ఈ విషయం ఏమవుతుందో త్వరలోనే తేలనుంది.

ఇకపోతే.. మహారాష్ట్ర ఎన్నికల్లో ఎవ్వరూ ఊహించని విధంగా ఈసారి కొన్ని ఫలితాలు వెలువడ్డాయి. ఇప్పటికే ఎంఐఎం పార్టీ నాలుగు స్థానాల్లో గెలిచి రికార్డు సృష్టిస్తే... తెలుగుతేజం ద్వారంపూడి మల్లికార్జునరామిరెడ్డి చరిత్రకెక్కారు. పశ్చిమగోదావరి జిల్లా గణపవరం మండలం ముప్పర్తిపాడు గ్రామానికి చెందిన మల్లికార్జునరామిరెడ్డి రామ్ టెక్ నియోజకవర్గం నుంచి బీజేపీ అభ్యర్థిగా గెలుపొందారు. ఒక సాధారణ కాంట్రాక్టర్ అయిన ఈయన.. రామ్ టెక్ ప్రాంతంలో పలు స్వచ్ఛంద సంస్థల ద్వారా సామాజిక సేవ, ప్రజాసేవ ద్వారా అక్కడి ప్రజలతో మమేకమయిపోయారు. దీంతో ఎన్నికల్లో పోటీచేసిన ఆయనకు ఓటర్లు ఆయన మీద నమ్మకంతో గెలిపించారు.

AS