ప్రపంచ నేతల మనస్సును గెలిచిన ‘నరేంద్రబాయ్’

Posted: 10/02/2014 07:39 AM IST

ప్రధానమంత్రి నరేంద్రమోడీని బీజేపీ అగ్రనేత ఎల్‌కే అద్వానీ మరోసారి ప్రశంసల్లో ముంచెత్తారు. ప్రధానిగా మోడీ అద్భుతంగా పనిచేస్తున్నారని కితాబిచ్చారు. ఇటీవల జరిగిన సార్వత్రిక ఎన్నికల్లో దేశ ప్రజల మనసు గెలిచి.. 30 దశాబ్ధాల తరువాత ఏకపక్ష మెజారిటీని సాధించిన మోడీ.. ఇప్పుడు ఐక్యరాజ్య సమితిలో తన ప్రసంగంతో మొత్తం ప్రపంచ నేతల మనసును గెలిచారని ప్రశంసించారు. మోడీతో పాటు, ఆయన మంత్రివర్గ సహచరులు కూడా చాలా బాగా తమ బాధ్యతలను నిర్వర్తిస్తున్నారన్నారు. ‘నరేంద్ర భాయి ప్రధానిగా గొప్ప బాధ్యతతో పనిచేస్తున్నారని గర్వంగా చెబుతున్నానన్నారు.

దేశంలో సజావుగా పాలన సాగించడమొక్కటే ప్రధాని విధి కాదు.. ఇతర దేశాలతో కూడా సత్సంబంధాలు ఏర్పర్చుకోవడం కూడా ప్రధాని ముఖ్యబాధ్యతల్లో ఒకటన్నారు. ఐక్యరాజ్య సమితి సాధరణ సభలో.. ప్రధాని హోదాలో తొలిసారిగా ప్రసంగించిన మోడీని ఆయన గొప్పనాయకుడని అభివర్ణించారు. అయితే, ‘భారతదేశ చరిత్రలో వాజ్‌పేయిజీని మించిన ప్రధాని లేరని... ఆయన పొందిన గౌరవం మరెవరూ పొందలేరంటూ చివరకు అద్వానీ ముక్తాయించారు.

జి. మనోహర్