గోకుల్ చాట్ దగ్గర సూట్ కేసు కలకలం

Posted: 09/23/2014 08:02 AM IST

హైదరాబాద్ లోని గోకుల్ చాట్ పరిసరాలు మరోసారి ఉద్రిక్తంగా మారాయి. ఏం జరుగుతుందో.., ఎక్కడ బాంబు ఉందో అని గోకుల్ చాట్ మేనేజ్ మెంట్, ప్రజలు భయంతో వణికిపోయారు. సోమవారం సాయంత్రం ఉన్న గోకుల్ చాట్ గోడ పక్కన ఉన్న అనుమానాస్పద సూటుకేసు కలకలం రేపింది. సాయంత్రం చాట్ తిందామని.., రిలీఫ్ కోసం స్నాక్స్ తీసుకుందామని వచ్చిన వారు సూటుకేసు చూసి వణికిపోయారు. అందులో బాంబు ఉందో ఏమో అని భయపడ్డారు. ఈ వార్త ఆనోటా ఈ నోటా తెలిసి బాంబు ఉందనే వార్తలు గుప్పుమన్నాయి. దీంతో కిటకిటలాడే ఆ ప్రాంతం ఒక్కసారిగా నిర్మానుష్యంగా మారింది.

విషయం తెలుసుకున్న బాంబ్ స్క్వాడ్ వెంటనే గోకుల్ చాట్ దగ్గరకు చేరుకుని అనుమానాస్పద సూటుకుసును స్వాధీనం చేసుకుని పరిశీలించారు. అందులో బాంబులేదని నిర్ధారించటంతో అంతా ఊపిరిపీల్చుకున్నారు. పోలిసులు వచ్చి తనిఖీలు చేసే వరకు అంతా బిక్కుబిక్కుమంటూ గడిపారు. అటు ట్రాఫిక్ పోలిసులు ఆ మార్గంలో వాహనాల రాకపోకలను కొద్దిసేపు నియంత్రించారు. 2007లో జరిగిన గోకుల్ చాట్ పేలుడు దుర్ఘటనలో పలువురు ప్రాణాలు కోల్పోయారు, చాలామంది శాశ్వత వికలాంగులుగా మారారు. ఈ పేలుడులో గాయపడ్డవారు ఇప్పటికీ కోలుకోలేదు.

 

 

కార్తిక్