ఉద్దవ్.. సర్థుకుపోదాం.. రండి..

Posted: 09/22/2014 05:18 PM IST

Amit shah calls uddhav thackeray on seat sharing in maharashtra

మహారాష్ట్రలో మిత్రపక్షాలైన బీజేపి, శివసేన పార్టీల మధ్య తలెత్తిన సీట్ల సర్థుబాటు వ్యవహారంలో నెలకొన్న ప్రతిష్టంభనను తొలగించడానికి బీజేపీ జాతీయ అధ్యక్షుడు అమిత్ షా రంగంలోకి దిగారు. పాతికేళ్లుగా ఇరుపార్టీల మధ్య కోనసాగుతున్న స్నేహబంధాన్ని ఇక ముందుకూడా కోనసాగిద్దామని.. అందుకని సీట్ల సర్ధుబాటు విషయంలో పట్టు విడుపులకు పోవాలని కోరినట్టు సమాచారం.

సీట్ల విషయమై శివసేన చేస్తున్న ప్రతిపాదనలను పునరాలోచించుకోవాలని ఉద్ధవ్ ఠాక్రేను ఆయన కోరారు. ఈ మేరకు ఆయన ఉద్ధవ్ థాక్రేతో ఫోన్లో మాట్లాడారు. రెండు పార్టీలు కలిసి పోటీ చేయాలని సూచించారు. పొత్తు పెట్టుకోకపోతే ఇరు పార్టీలకు నష్టమని అమిత్ షా తెలిపారు. ముఖ్యమంత్రి పదవి శివసేనకు ఇచ్చేందుకు అంగీకరిస్తే.. శివసేన మరి కొన్ని సీట్లు బీజేపీకి ఇచ్చేందుకు ఒప్పుకోవచ్చని పార్టీ వర్గాలు భావిస్తున్నాయి.

అక్టోబర్ 15వ తేదీన జరగనున్న.మహారాష్ట్ర అసెంబ్లీ ఎన్నికలు కోసం ఇవాళ ఉదయం ఉద్ధవ్ను పిలిపించిన అమిత్ షా.. రెండు పార్టీల మధ్య బంధం తెగిపోకూడదని సూచించారు. 288 స్థానాలున్న మహారాష్ట్ర అసెంబ్లీలో తాము కనీసం 135 చోట్ల పోటీ చేస్తామని బీజేపీ అంటుండగా, శివసేన మాత్రం 119కి మించి ఇచ్చేది లేదని అంటోంది. రానున్న శుక్రవారం నామినేషన్లకు చివరి తేదీ కావడంతో బెట్టు వీడాలని కోరారు. మరి థాక్రే ఏమి నిర్ణయం తీసుకుంటారో వేచి చూడాల్సిందే.

జి.మనోహర్